Nos Soca King 2020 Antoni “Black Diamond” Gario a tuma e encargo aki hopi na serio y como tal a acepta e bishita cerca diferente instancia, departamento, compania y invitacionnan personal cu el a ricibi. Uno cu sigur cu a hala hopi atencion diahuebs mainta tabata esun na Dr. Horacio E. Hospital cerca e pashentnan di dialyse.
Na momento cu un persona ta sufri di cualkier kebrante di salud, un poco di musica ta haci un diferencia grandi den bo estado di animo y ta esaki mes a inspira e bishita aki pa asina duna un tiki di ambiente carnavalsco na e pashentnan cu ta bringando duro pa mehora nan salud.
Un tiki di e Cucu Soup a pone tur hende den ambiente di carnaval y a pone hopi sonrisa na cara. Un alegria total den e centro di Dialyse caminda a gosa un mundo cu e bishita aki. Por a tuma nota di nursenan bailando y e pashentnan gosando di e presentacion di e King of Soca te cerca nan. Varios otro departamento tambe a haya bishita y ohala esaki por a trece un tiki alivio den momentonan menos bon cerca nos pashentnan na Hospital. Musica semper lo ta e remedi universal unda cu e yega. Pabien na tur cu a haci e bishita aki posibel.
