Elsa Rozendal di MAN: ke sa kon ta pará ku e trayekto di ‘doorlichting’ di fundashonnan ku ta haña supsidio di Gobièrnu

96

Na aña 2019 i 2020, Parlamento a aprobá presupuesto di pais Kòrsou kaminda a kòrta den e supsidio di fundashonnan. 

Hustifikashon pa esaki tabata e situashon finansiero prekario ku nos pais tabata pasando aden i un ‘Aanwijzing’ ku tabata menasá pa bini i ku despues nos a haña tambe. 

Segun Rozendal, Minister di Finansa a indiká ku huntu ku e rekorte lo hasi ehersisionan pa hasi un ‘doorlichting’ di e diferente fundashonnan pa sa si e supsidio ku nan ta risibí ta keda uzá efektivamente i tambe pa wak unda por ‘cluster’ fundashonnan ku ta hasi e mesun trabou. 

Tur esaki pa logra haña un mihó bista riba repartishon di e supsidionan na e fundashonnan pero tambe unda mester hasi ahuste. Pa sa, por ehèmpel, si tin fundashonnan ku kisas asta mester haña mas fondo. 

Segun Rozendal mester tene kuenta tambe ku tin fundashonnan ku ta teniendo kabes riba awa i e fondonan realmente no ta yega. Sin kita for di bista tambe ku hopi fundashon ta hasiendo un tremendo trabou i ta kumpli kabalmente ku e ‘Subsidieverordening’ i reglanan vigente.

Den e rapòrt Mollen di 2014 ta hasi rekomendashonnan pa ku funshonamentu di fundashonnan i e parlamemtario ke sa kiko a hasi ku e rekomendashonnan aki. Den su karta pa e titular di Finansa, Rozendal ke sa tambe kua ta e ehersisionan ku e Minister ta hasiendo òf ta bai hasi pa por kita e rekorte den e supsidio ku fundashonnan ta haña.