E santuario di burico na Aruba ta di fiesta den e dianan aki. Exactamente 25 aña pasa e fundador di e santuario di burico, Ramon Boekhoudt, a busca refugio p’e prome burico cu yama Bambam. Ainda Bambam ta na bida y ta bibando conhuntamente cu 130 otro burico den e santuario.
E santuario di burico a bira un atraccion turistico riba nos isla, cu un total di mas o menos 30.000 bishitante pa aña. Pero mas cu esey e Sanctuario ta un lugar di refugio, cuido y siguridad pa nos buriconan. Mas cu 40 boluntario ta duna nan tempo, amor y cuido na e buriconan.
Pa celebra e fecha historico aki, e santuario di burico a organisa un feria diadomingo, 24 di April di 10 or mainta pa 3 or atardi. Lo bay tin hopi actividad pa grandi y chikito. Lo bai tin 30 booth cu diferente artesania y producto. EMCO lo print t-shirt y e companianan manera Kooyman, Shrek y Flora Market hunto cu varios artista local lo show nan productonan. Lo bai tin musica pa deleita un y tur. Hasta los tin varios wega pa mucha y tambe dushi cuminda y bebida di benta. Varios shelter y organisacion di bestia tambe lo ta presente. Un “auction sale” cu bunita mercancia ta riba agenda tambe. Angela Tiemens di radio emisora local lo bay ta e maestro di ceremonia.
