Diabierna den Cas di Cultura tin e premier di e pelicula Siñami Stimabo 2- Pordon. E ta un continuacion di e prome parti cu a sali na 2016 y ta conta kico a pasa cu e personahenan. E pelicula aki ta na Papiamento.
Marilyn L. S. Richardson, escritor, productor y director, a indica cu Siñami Stimabo 1 a nace na 2015 cu e titulo Huicio, esta con lihe ta husga otro. Pero e pelicula aki ta filma shete aña pasa, pero awo ta sac’e. El a splica cu a dura hopi pasobra tin cos menos agradabel, menos placentero a pasa. Richardson a bira dos bes malo, pero tambe tanto di su banda como e cinematografo a perde ser keri. Sin lubida Covid a dal.
Pa loke ta trata e pelicula aki, pueblo por spera di hari hopi, yora hopi, rabia. Por spera un roller coaster di emocion. Den e pelicula aki tin punto cu por yuda e pueblo, por yuda hopi hende mirando cu nan a trata situacion real. Diabierna, 12 di april, ta tuma luga e Red Carpet pa 7:00 pm mientras cu e pelicula ta inicia pa 7:30 pm na Cas di Cultura.
Braynsly Emerenciana, actor, a conta cu e ta haci e papel di Teaser den e prome pelicula. Teaser tabata un persona di caya, pero na final di pelicula el a cambia. Den e di dos pelicula Teaser ta bay dedica na su famia, na su yiu cu ta na caminda. E pelicula tin un mensahe specialmente pa cada un cu presenta diabierna pa mir’e. El a invita pueblo pa presenta na e evento di Red Carpet y pa mira e pelicula aki.
Jahlina Richardson, actriz, a haci e personahe di Brenda den Siñami Stimabo 1- Huicio. Richardson a splica cu su personahe ta un persona ta un bon mucha di cas, pero a bin topa cu un guy di caya. Nan a basila te cu e personahe a sali na estado. Den di dos parti di e pelicula ta basa di kico a pasa cu e personahenan, unda cu Teaser a bira homber di famia. Pero, ningun hende sa kico a pasa cu Brenda.
Manera a mira e parti 1, e ta invita tur hende pa mira e parti 2. E pelicula aki ta di local pa e localnan, e pelicula tin di haber cu loke hende a experencia of sa di dje. E ta invita tur hende pa yega y mira e mensahe cu nan a trece dilanti den e parti dos, cu tin di haber cu pordon. Hopi biaha no ta compronde pakico pordona hende, pero awo ta bay splica esey. “Pordon no ta solamente pa bo, e ta eigenlijk pa e otro persona tambe.”
