Diabierna e prome casonan cu ta aparece riba rol di Corte ta e sentencianan di : Angel Augusto Alvarez Colina; Juan Carlos Alvarez Colina; Alvaro Luis Lopez Lugo y Carlos Maria Gavilan.
E tres Venezolanonan a wordo acusa cu dia 20 di october, 2018 nan a trece un grupo di ilegal pa Aruba. Tin ta papia di 10 ilegal, y otronan den e boto cu a keda deteni ta menciona entre 24 pa 25 persona. Hecho ta cu durante tratamento di e caso tres siman pasa, Fiscal a pidi castigo di 10 aña pa cada un di nan, manera e dicho ta bisa “samen uit, samen thuis”.
https://www.facebook.com/24ora/videos/241895626489114/
E capitan, Juan Carlos, a nenga categoricamente di ta capitan. Segun e splicacion cu el a duna tabata cu simplemente e grupo a pone placa hunto pa cumpra un boto (y motor) pa nan tur yega Aruba y busca un miho futuro. Pero e situacion a sali di man, ya cu un poco prome cu nan yega costa, e boto a pega den rif y nan mester a landa pa yega costa. E boto no tabatin sistema di comunicacion, no tabatin iluminacion y tampoco “zwemvest”. Consecuencia di esaki ta dos Venezolano den intento pa yega costa. Un di nan su esposa tambe tabata abordo.
Un di esnan cu a hoga a haya cerca di costa y e otro algun meter for di e boto, pues e no a yega mucho den su intento pa pisa suela Arubano, cu tabata mas o menos 20 meter for di unda e boto a keda pega. Un di e pruebanan cu a uza den e caso aki, ta un celular confisca di un di e ilegalnan deteni. Riba dje tabatin diferente mensahe y voice note, den cual e bos di e supuesto capitan ta reconocibel. Y asina e caso a cuminsa lora. Awe mainta e tres personanan aki ta bay haya sa si pa ley nan ta culpabel y cual ta e castigo cu Corte ta impone riba nan.