Den un presentacion pa prensa dialuna den Theresita Center na San Nicolas, e organisacion San Nicolas Business Association (SNBA), a duna informacion di e Business Summit cu ta bay tuma luga riba 21 di augustus.
Presidente di SNBA Andres Hernandez, a splica cu e idea pa organisa e cumbre a surgi mas o menos cinco luna pasa, ora cu nan a topa cu algun miembro di caya principal. Di e 20 miembronan, cu no ta bar ni banconan, a resulta 5 a informa e organisacion cu na luna di januari ta bay cera nan portanan. E hecho aki a bati un alarma cerca e organisacion, cu mester cuminsa haci algo di biaha pa reactiva e movecion y interes pa caya principal di San Nicolas.
Asina a surgi inicialmente un sesion di brainstorming cu mester a titula “Rescue San Nicolas Now” cu a wordo acepta door di e directiva. Pero e plan a keda amplia te cu a dicidi pa hacie den forma di un cumbre. E mesun presidente tabatin contacto cu varios Gobernante riba e situacion y nan tur a brinda nan apoyo na e idea aki.
Den e cumbre ta bay ta presente Ministernan di Gabinete Wever Croes pero tambe inversionistanan interesa pa trece un fluho di movecion den San Nicolas den e siguiente seis lunanan. Ta haci un apelacion na pueblo pa apoya SNBA den e proyecto aki. Debi na e espacio limita, e no ta habri pa publico sino pa invitadonan so y cu prensa. E evento ta tuma luga riba diaranson, 21 di augustus, for di 9’or di mainta te cu mas o menos 2’or di atardi. Theresita Center e dia aki ta bay bira Theresita Convention Center.
SNBA ta kere cu ta bay tin hopi cos positivo pa bisa den e proximo simannan, despues di e cumbre ya cu tur e inversionistanan interesa mester presenta cu nan plan socio-economico y mester ta algo pa cuminsa den e seis lunanan cu ta sigui. “Nos ta hopi positivo cu lo tin cambionan cu e cumbre aki,” Hernandez a bisa.
ERROL DE FREITAS
Errol de Freitas ta secretario di SNBA a bisa cu esaki ta e prome cumbre cu nan ta organisando, unda cu ta trece hunto tur esnan encarga pa tuma decision riba tereno gubernamental, banconan cu ta interesa den financiamento y inversionistanan cu tin proyectonan cu por wordo realisa a termino corto.
Den e cumbre mester bini cu sugerencianan cu cual por formula un plan cu por funciona pa pariba di brug y San Nicolas.
Importante di e cumbre aki, ta cu ta sinta na mesa pa wak cual ta e proyectonan cu por keda concretisa den e siguiente seis lunana. SNBA ta contento di e acogida ricibi pa e cumbre y mester a cera inscripcion. Tin rond di 20 inversionista interesa berdaderamente den San Nicolas. “E situacion ta hopi slow ultimo añanan y nos kier trece cambio den esaki.”
Loke e por bisa cu kier crea un desaroyo total, cuminsando for di Balashi bin ariba y no concentra solamente na San Nicolas. SNBA ta contento cu Gobierno a mira e importancia di e cumbre aki y a brinda tur nan apoyo. Gobernador Alfonso Boekhoudt ta bay ta keynote-speaker durante e evento.
