Sindicato SEPPA tambe ta representa un grupo grandi di trahado di Traimerdia y bin ta representa nan den e problemanan cu nan a confronta e ultimo lunanan. Na final di aña escolar tabata tin problema y awo manera cu e aña escolar a cuminsa, nan a bay cay bao di un otro Minister.
Segun Edmundo Marlin, e traspaso aki a bay bao di un Decreto Ministerial cu e Minister di Enseñansa a firma, cu Traimerdia lo pasa bao di e Minister di Asuntonan Social.Loke tin cu haci awo ta e LIM, ey e cambio tin cu bin. Pero actualmente, basa riba e MB cu e Minister a firma, ya e Minister di Asuntonan Social, tin full autoridad riba Traimerdia.
Diabierna mainta, tabata un alegria enorme bao di e trahadonan di Traimerdia, ora cu por fin nan a haya un contesta. Despues di esey, e Minister a invita nan pa e mesun atardi pa 5’or, pa mira con lo sigui. E reunion a tuma luga, caminda cu e Minister a informa cu e lo bay encarga un persona cu lo tin e encargo pa atende cu Traimerdia y tambe e parti financiero.
For di su Ministerio e lo pone un persona cu ta di DRH cu ta na disposicion di su Ministerio actualmente, pa bay atende cu e parti di personal. Tur asunto di personal, e persona aki lo ta encarga cun’e. Tambe e Minister a menciona, cu e centrum leidernan y e huiswerkbegeleidernan, lo bin bek den Traimerdia. Tambe ta uzando como punto di salida pa cuminsa draai Traimerdia den un forma trankilo, ta bay bek na organogram, cual tabata na vigor na augustus di 2018.
Esey ta e punto cu nan lo sali cun’e. Na caminda, si tin cambionan cu tin cu tuma luga, e lo tuma luga hunto cu bureau di Minister, hunto cu e trahadonan, cu SEPPA y esun encarga cu Traimerdia, si acaso cu tin mester pa e cambionan necesario pa Traimerdia draai mas optimal.
Tambe e minister a bisa cu tur e toolsnan necesario pa Traimerdia, manera e asunto di trailer, mobilario y otro asuntonan cu e trahadonan ta preocupa cun’e, pa motibo cu nan mester di e toolsnan ey pa nan por traha optimalmente, ta bay atende cu nan. E palabracion ey e Minister a duna, segun Edmundo Marlin.
