Na oficina di Mediador di Gobierno e ultimo simannan aki trahadonan cu ta afilia na un of otro sindicato ta boks den otro, buscando peticion pa referendum of pa cambio di sindicato. E liña cora cu ta core entre mayoria peticion ta di miembronan di sindicato STA cu kier bay pa SEPPA. Den algun caso, ta miembronan cu tabata afilia na SEPPA caba pero kier “bay cas bek”.
Trahadonan di Postkantoor
E discusion interno, cu no tur ora ta mira luz di dia a cuminsa na Postkantoor. Nan tabata afilia durante hopi aña na sindicato SEPPA pero pa un motibo of otro a opta pa afilia na STA. Pero e ultimo simannan, e trahadonan di Post afilia na STA ta sinti cu no ta honra nan peticionnan of no tin atencion pa nan, a manda pidi pa cambia pa SEPPA. E proceso a bay asina lihe cu e trahadonan a uni bou di nan mes ya manda carta colectivo pa gerencia di Post bisando cu nan no ta cu STA mas y cu nan ta cu SEPPA awor. Consecuentemente, e director di Postkantoor a dicidi di honra e peticion y awor ta considera SEPPA e sindicato den e compania di gobierno.
Trahadonan di ANSA
Pero e dolornan di cabes pa Sindicato STA no ta limita solamente na Postkantoor, pasobra na Air Navigation Services Aruba N.V. (ANSA), un compania nobo cu minister Otmar Oduber a funda na 2014 pero cu a bira un realidad na principio di 2015. E tempo ey STA a prepara e miho CAO di Aruba y na 2019 a hacie mas miho ainda, den cual trahadonan a bay dilanti cu como 500 florin pa luna. Tabata bisto for di principio caba cu e CAO no ta duradero y cu e compania lo no por carg’e pa largo.
Cu realidad di e pandemia riba mesa, mester a corta pisa y ANSA a mira un caida drastico den cantidad di avionnan cu ta baha y subi na Aruba. Cu esey di mes a sinti un caida directo den nan entradanan cu ta bin via un “Consession Agreement” cu Aruba Airport Authority N.V. E ultimo aki tampoco ta pasando den su miho momentonan y a laga hopi trahado bay cas cu un pakete bou brasa y a ofrece un otro grupo un pakete boluntario, mientras a corta den nan gastonan di operacion.
Awor e trahadonan na ANSA ta sinti cu STA no ta saliendo pa nan problemanan y como tal, a pidi pa cambia pa sindicato FTA. Di eynan awor lo organisa un referendum bou di e empleadonan pa mira si, den forma democratico, cua sindicato tin mas sosten bou di e trahadonan. Den e siguiente dianan lo mester apunta un fecha pa e referendum aki y mira si berdad tin mas trahado cu ta simpatisa cu FTA compara cu STA.
Trahadonan di Arubus
Na nos compania nacional di transporte publico, ARUBUS, e trahadonan tambe kier pa SEPPA representa nan interesnan. Awor aki nan ta cu sindicato STA pero ey tampoco e miembronan no ta satisfecho y no ta haya cu e sindicato ta dedica tempo na nan problemanan. Mediado di Gobierno a saca un aviso den cual ta anuncia cu trahadonan a pidie un referendum pa SEPPA representa nan y ta duna tur otro sindicato 2 siman di tempo pa nan inscribi nan mes pa participa den e referendum, si nan ta desea esey.
Trahadonan di Aruba Ports Authority
E trahadonan riba waf, cu ta traha pa Aruba Ports Authority, specificamente e miembronan di staff, awor ta afilia na sindicato TOPA. Nan no ta di acuerdo cu e maneho di e sindicato y como tal tambe ta den deliberacion cu SEPPA pa haya nan representacion y lo pidi un referendum dentro di poco. Ey por nota cu, si antes trahadonan no tabata mucho interesa den afiliacion sindical, cu awor si…memey di e pandemia y su consecuencianan, tur hende kier conta riba un representacion sindical cu ta digno na interes di e miembronan.
Mucho cerca di Gobierno?
Si tuma nota di e dos sindicatonan cu awor ta na un skina pa perde miembro, por nota cu ta precisamente STA y TOPA. Ambos sindicato, na mas di un ocasion a yega di mustra nan simpatisa na e gobierno actual y e presidente di STA hasta a campaña publicamente pa MEP. Si esey a yuda STA na un principio pa trahadonan sinti cu ey nan ta miho mira cerca e gobierno na mando, cu e cambio di pensamento cu ta biba awe den pueblo, awor e mesun trahadonan no kier tin un sindicato asina cerca di gobierno mas. Ta e mesun afiliacion politico y mucho cerca di gobierno, awe lo costa e sindicatonan aki afiliacion di miembronan, cu na final ta debilita nan posicion di negosacion cu gobierno y di otro banda lo enforsa e posicion di e sindicato SEPPA y FTA.
