Musiconan a uni awe trempan, pa 5:30am na Kapel di Alto Vista, pa hunto resa pa nan compañero di musica Ingomar Flanegin, pero tambe pa otronan cu ta malo. E ta contagia cu COVID-19, pero na mes momento a haya mas complicacion di salud, cu consecuencia cu a intern’e den cuido intensivo (ICU). Ingomar tabata masha conoci den e banda Sound ‘N More.
Jeremy Lampe, director musical di Sound ‘N More, a bisa cu nan colega cu a contagia cu COVID y a bira hopi malo. A topa cu e cantante ora el a sali for di e banda Dream, pero el a canta hunto Sound ‘N More y a gusta. Desde e tempo ey te fecha di awe, Ingomar ta cu e banda.
E ta un hende cu ta yuda otro musico tambe, manera Robert “Riba Wiel” Thiel door di raspa y canta. No solamente pa musica nan ta cu otro, pero nan ta topa y combersa pa pasa rato agradabel.
Thiel a splica cu nan a bini hunto casi tur diadomingo na kapel pa gradici Mama Maria, pa salud pasobra esaki ta yuda nan spiritualmente. E biaha aki nan a bini hunto pa pidi p’e salud di Ingomar y cu e mehora.
Robert JeanD’or, musico, a bisa cu nan a bini hunto pa pidi cu Ingomar mehora. Tiki tiki Ingomar ta mehora y esey ta loke e musiconan ta desea. Varios musico a presenta na Kapel di Alto Vista pa resa, pero tambe a informa JeanD’or con ta bayendo cu Ingomar Flanegin.
