Desde diahuebs ultimo, dia 1 di juli, Aruba Stevedoring Company (ASTEC) tin un hefe nobo na cabes di e compania. Ta trata aki di e conocido Raymond “Ray” Buckley, cu den pasado tabata maneha refineria Valero y despues CITGO. E compania a parti caminda cu e director saliente, esta Mike de l’Isle. Kico a sosode cu a pone cu de l’Isle mester a bay pa Buckley drenta, no ta conoci.
Ray Buckley a forma un carera impresionante den e mundo di refineria. El a bira e prome Rubiano pa tuma e posicion di mas halto den un refineria, esta di general manager y vice-presidente na aña 2005, tempo cu Valero Energy tabata doño y operado di e refineria riba nos isla. Ta bon pa resalta cu Buckley tabatin posicionnan clave den gerencia di Coastal, El Paso y den CITGO. Tur esaki banda di otro funcionnan den varios hunta di supervision di entidadnan importante riba nos isla, manera ta hospital.
Binmento di Ray Buckley na ASTEC, aunke ta temporal, ta trece cu ne su experiencia extenso riba nivel di liderazgo y di gerencia ehecutivo. E doñonan di e compania ta convenci cu Ray Buckley lo ta capas pa hiba ASTEC na e siguiente nivel di crecemento y desaroyo.
Di otro banda, a gradici Mike de l’Isle pa su contribucion den e ultimo diesun añanan como director di ASTEC. E ta studia na TU Delft como Master of Science den ingeneria mecanico. Su carera profesional a cuminsa na Air Liquide America, sigui pa Valero Aruba, despues na Starcon Aruba, ASTEC pa 11 aña y awo a funda su mesun compania, E4G Services LLC na Aruba.
ASTEC N.V. ta existi desde September 1983 y ta conta cu no menos di 80 empleado bon entrena pa ofrece e miho servicio posibel na tur barco di carga cu mara na nos waf. Anualmente ta descarga entre 300 pa 400 barco di carga. ASTEC N.V. ta partner cu Aruba Ports Authority (APA NV) den construccion, financiamento, operacion y mantencion di e terminal nobo di waf di carga situa na Barcadera.
