Den cualkier organisacion semper tin adaptacion y cambionan pa mehora y sigui crece, den e caso di “Bo Guia 88.9 FM” no ta un excepcion. Den tur formula y situacion, semper mester tin un plan ‘B’ pa tur cos, e por ta minimo t’e na esun mas grandi pero semper tin espacio pa sigui fortalece loke ya caba tin.
Pa logra esaki semper e base ta lealtad y bondad, cu e elementonan aki, gerencia di Bo Guia 88.9 FM, despues di a delibera internamente y exponiendo tur posibel scenario, a yega n’e conclucion pa haci algun adaptacion y ahusta e programacion regular den siman. Manera tur hende sa, Bo Guia 88.9 FM ta para pa loke ta di nos y ta e unico cu ta sostene tur artista local di tur genero, di esun di antaño te n’e artista actual.
Pa cu esaki a pone tur punto riba mesa y expone kico t’e plan pa adapta programacion di dialuna pa diabierna. Melvin Garcia a bay conforme cu e ‘switch’ pa 10:00 am, e ta conoci pa su animacion, variacion, su toke di farandula local y energia pa cual ta hib’e te cu 12:00 pm, net prome cu Enfoke.
Pa su experiencia esaki ta un streya mas riba su curiculo, ademas manera e mes a duna di conoce: “Mi’n tin cu regala y parti premio, loke si tin na gran cantidad ta alegria, animacion, entretenimento y energia, cos cu placa no por cumpra”. Di su parti e simpel hecho di a ‘slip and slide’ den e orario di 10:00 am ta haci cu e mainta nan lo ta di dje manera e mes a manifesta cu masha entusiasmo.
Mester menciona cu Bo Guia 88.9 FM ya a adapta e orario di merdia caba algun luna pasa, ora cu a añadi e noticiero estelar ENFOKE for di 12:05 pm pa 2:00 pm, for di dialuna pa diabierna, cu e presentadonan Nelson “Speed” Andrade y Patrick Paskel. Ambos ta gosa di un amplio experiencia den periodismo y ta presenta e noticiero na nan mesun estilo, den cual ta combina noticia y entretenimiento. A nota un crecemento enorme den audiencia ora a haci e switch aki, di cual tur hende ta claba na Bo Guia tur merdia pa scucha lo ultimo den noticia.
Den e mesun rosea gerencia di Bo Guia 88.9 FM a adapta e orario di atardi tambe, ora a añadi Sylvia Tromp for di 3:10 pm pa 5:00 pm. E lo comparti su alegria y masha hopi sabor, ofreciendo asina un dimencion diferente den e orario menciona. E contenido di e sazon varia di Sylvia lo percura pa haci di e espacio ey algo dushi di dje, di cual hopi hende conoce su estilo particular.
Bo Guia 88.9 FM a señala cu diaranson 7 di luna 7 tin su nificacion special cu en realidad ta mucho mas cu e supersticion di “Lucky #7”. Ora bo traha disciplina y cu fe, nada por bay malo, pesey den e caso aki gerencia di e radio ta inclina su mes n’e adaptacion menciona cu firmesa y confiansa total.
Diaranson 7 di luna 7 (juli) por conta cu e adaptacion aki cu sigur ta cubri un spectrum hopi positivo di bon energia y no solamente pa Bo Guia 88.9 FM, pero specialmente p’e audiencia cu a bin ta crece gradualmente. Den e delaster encuesta, por ehempel meymey di 20 stacion di radio riba e banda FM, Bo Guia 88.9 FM a ocupa e di 3 luga den sintonia nacional c’un margen hopi chikito di diferencia di esunnan su dilanti. Esaki sigur cu, por lo minimo cu e por nifica, ta bisa hopi cos!
Mas ainda cu ta mustra di tin un alcance grandi den diferente tipo di oyentenan cu ta scucha tur dia y manera gerencia a señala: “Ta mas divertido pensa den futuro cu coba den pasado”.
