Diamars anochi polis a presenta na un adres na Jan Flemming pa un caso basta serio. Aki ta caminda cu un duo arma a drenta den un cas y menasa e habitantenan cu arma di candela, segun informacion. A mobilisa basta patruya di polis, cu a cuminsa cu un buskeda intesivo den e area.
Na altura di Jan Flemming 15 a topa cu tres hoben para di un forma basta sospechoso. E trio tabata lomba afo. Un rato despues e habitantenan unda a drenta nan cas, a confirma cu ta e tiponan aki t’esunnan cu a drenta nan hogar, segun informacion ricibi. A detene tur tres sospechoso y transporta nan pa warda di polis caminda a presenta nan dilanti un subfiscal.
Un rato despues, a topa cu un otro hoben n’e mesun adres bisti cu bulletproof vest y un arma di airsoft. El a purba core pa polis pero den algun seconde a mand’e suela y deten’e mesora. A confisca e articulonan y a transporta e sospechoso pa warda di polis tambe.
