Diadomingo anochi den careda di 10’or, a tuma luga un pelea y destruccion cu arma, na Tanki Leendert. Polis a wordo manda den direccion den vecindario di Los Cafeteros, caminda cu tabata tin un pelea basta pisa entre dos pa tres homber.
Segun informacion di esnan cu a yama, ta bisa cu tin uso di arma, palo, arma blanco, biga, bat, tur esey ta wordo menciona durante e yamadanan cu tabata drenta na polis.
Unidadnan di Noord tabata e promenan cu a yega na e sitio. Y eynan ta topa cu dos homber cu tabata tin problema cu otro.
Aparentemente e asunto a pasa pa motibo cu uno lo a mishi cu auto di un otro. Esun no a gusta. El a cuminsa reclama e otro y el a bay den auto, saca un pat’i cabra y a bay pa agredi e otro partido.
Tabatin manera un coremento. Ora cu el a swing e pata di cabra, e otro a ten’e y asina nan a keda lucha cu otro, te cu alarma a wordo bati y polis a yega y a detene esun cu a pasa man pa un pat’i cabra pa agredi e otro.
E lo a dal e otro un mokete tambe. E persona tabata tin e pat’i cabra, a dal e otro partido un mokete den su wowo y lag’e herida.
Polis a detene esun cu a comete agresion y tabata tin e pat’i cabra, y a confisk’e. A listra den su auto. A bay cu e agresor warda y a bisa e victima pa bay hospital pa wordo atendi y despues pa bay tambe na warda pa entrega un keho cu rapport di dokter, riba loke a sosode.
Ta wordo menciona tambe cu tabata tin cierto destruccion cu a tuma luga, pero polis a cana rond pa tira un bista kico por ta e daño cu a keda atras, pa motibo di e problema cu a surgi, pa motibo cu uno a mishi cu auto di un otro.
