E agencia di biahe “Colombian Adventure” ta Bou investigacion pa estafa di casi 40 mil florin di e grupo di tennis “The Champs Tennis Club Aruba”. E grupo di tennis ta existi 42 aña y ta custumbra di biaha tur aña na October hunto cu nan famia y amigonan. E aña aki a dicidi di bishita Pereira, Colombia pa hunga tennis na e club “Club Campestre” y tambe pa conoce e luga. E biahe pa Colombia tabata di 6 pa 13 di October, organisa pa Lina Maria Rios Martinez di e Travel Agency “Colombian Adventure”.
Dia 3 di October, tres dia prome cu e vuelo tabata tin un anochi di informacion na unda cu e señora tambe tabata invita. E dia ey e mester a entrega e grupo e ticketnan di buelo, pero el a bisa cu e no a haya tempo di imprimi nan pasobra henter dia e tabata tin migraine. E lo a trece nan su siguiente dia.
Pero e siguiente mainta a bati alarma, ora cu un persona den e grupo a haya informacion cu Lina Maria Rios Martinez di “Colombian Adventure” ta sospecha di estafa. Parce ya antes e persona aki lo a estafa varios grupo caba. The Champs a yama Avianca pa averigua si e grupo tabata riba buelo dia 6 di October y tambe a yama e hotel na Pereira pa check si nan tin reservacion pa e grupo den e hotel pa e siman ey.
Aki a cera conoci cu e tristo realidad cu no tabatin nada reserva, ni vuelo ni hotel. E noticia aki a cay manera un baño di awa frieu pa e grupo. Nan a cuminsa paga for di fin di April y a haci e ultimo pago dia 30 di September. Placa cu nan a spaar henter aña pa bay vakantie. Algun di nan placa di nan pensioen. Tin di nan cu a tuma dianan di vakantie di trabao. Con un hende por ta asina cruel.
Nos di “The Champs Tennis Club Aruba” ta informa esaki na pueblo di Aruba, pa e persona aki no estafa ningun grupo mas. Lina Maria Rios Martinez parce a estafa placa di varios grupo caba y no ta cumpli cu su debernan como “Travel Agent” y ta laga hende yega te na aeropuerto pa haña sa cu absolutamente ningun ticket di vuelo a wordo reserva.
“The Champs Tennis Club Aruba” a entrega un keho oficial caba na Centro di Husticia, entregando tur e pruebanan y ta spera cu e miembro nan por haya nan placa bek. Informacion tambe cu a drenta ta bisa cu a detene e sospechoso envolvi pa sospecho di estafa. Recherche di Santa Cruz ta conduciendo e investigacion e momentonan aki.
