Tabata fin di luna di maart cu a presenta un incidente na Noord, ora cu un chauffeur burachi a causa un accidente. Polis a yega na e sitio y a detene e homber mesora, cu despues a resulta di ta e director di Aruba Bank. Su tras a sigui e decision pa suspend’e e ehecutivo fo’i su funcion, debi na su problema cu alcohol.
Un rato pasa Hunta di Supervision di Aruba Bank y accionista a informa cu Peter Staal, Managing Director di Aruba Bank, a renuncia inmediatamente pa motibo personal. E banco a gradicie pa su dedicacion y a dese’e tur cos bon den futuro.
E bankero no tabatin mucho opcion, pasobra Banco Central ta pone hopi presion riba integridad di ehecutivonan den funcionnan halto asina na banco y companianan di seguro. E supervision riba banconan y companianan di seguro ta bay mas leu cu djis controla cifranan. E retiro inmediato aki d Peter Staal for di Aruba Bank lo bira un problema p’e pa e logra haya aprobacion di Banco Central pa ocupa cualkier puesto igual den Reino Hulandes.
