Den cuadro di dia mundial di salud, cu a tuma luga ayera, minister di salud, Dangui Oduber, a realisa un bishita na Dr. Horacio Oduber Hospital n’e departamento di Cenetr for Advanced Wound Care. Esaki pa e por cera conoci cu e personal como tambe haya mas conocemento dje servicionan cu nan ta brinda na e centro. Durante un conferencia di prensa cu a tuma luga posteriormente, director di hospital, Jacco Vroegop, a menciona cu den e ultimo dos añanan hospital a inverti hopi den e pashentnan di COVID-19. Mas cu claro, esaki ta keda un punto di importancia den cualkier maneho di un hospital como tambe ministerio di salud. Pues, a pesar cu a flexibilisa mas cu por, ainda e pandemia t’ey cu variante y subvariante nobo propagando na otro pais.
Pa e ultimo aki, a puntra minister Oduber si tin algun maneho na luga pa si un re-brote mester tuma luga. Oduber a splica cu manera ya ta conoci e ultimo dos añanan cu a caba di pasa tabata dificil y a presenta varios reto y cu a atende un cantidad di pashent den e unidad di COVID-19.
E ultimo aki sigur a conduci na cu awo Aruba ta mas miho prepara pa si mester bolbe surgi un situacion manera esun di COVID-19. Tambe el a menciona cu e personal (AMI-personeel) manda pa Hulanda tambe a aporta un asistencia y cooperacion significante den esaki. Relaciona cu esaki, gobierno di Aruba a palabra cu Hulanda cu structuralmente lo bay amplia e unidad di cuido intensivo p’asina tin mas cama y personal pa por ta miho prepara pa cualkier eventualidad.
Pa un relato mas amplio lesa edicion di TREMPAN.
