Awe tabata e ultimo dia di operacion di CITGO Companashi hunto cu Speedy Food Shop na Caya Ernesto Petronia # 21 situa net dilanti Top Car. E stacion di gasolin, opera pa Fuels Marketing & Supply Aruba (FMSA), a yega na un acuerdo cu doño di e tereno, Jolley Holding, pa cera e establecimiento, pasobra e doño kier traha un showroom mas grandi eynan. E situacion economico di mes tampoco a yuda.
Na aña 1968 famia Harms y van Veen a cuminsa cu Topcar y dos aña despues, na aña 1970 a cuminsa cu un stacion di gasolin bou di e branding di “Shell”. Despues di hopi aña a pasa e operacion di e stacion completamente over pa FMSA, pero e tereno semper a keda di Topcar y Jolley Holding. Pa nan for di hopi aña pasa caba e plan tabata pa amplia e showroom di Topcar, pero FMSA a purba di tur forma pa por a mantene e stacion operacional. Pero, despues cu e ultimo lunanan e situacion economico a sigui empeora, no tabatin mucho motibo mas pa mantene e negoshi cu cabes riba awa.
Mas stacion lo cera
Informacion di esunnan cerca di e decisionnan a sigura cu CITGO Companashi lo no ta e unico stacion di gasolin cu ta cerando den e temponan aki. Parce cu tin por lo menos un mas cu tampoco lo no sobrebibi e normal nobo. No cu ta cera unicamente pa motibo di Covid-19, sino mas bien pasobra di masha tempo caba nan ta purbando tur forma pa por mantene cabes riba awa pero e retonan a sigui bira mas hopi y cu e sla di Coronavirus, el a bira mortal. Di otro banda, binmento di mas stacion di gasolin tampoco ta yuda den e proceso pasobra na final….e mercado no ta crece mucho mas, sino e clientenan lo “shift” di un stacion pa e otro. Lo por aplica e dicho na Hulandes “De ene zijn dood is de ander zijn brood”.
Menos uzo di combustibel e ultimo lunanan
Mester tene cuenta cu e decision di Toque de Queda y Shelter in Place a haci cu mundialmente transporte a haya un sla duro y su tras, e uzo di combustibel. Imagina cu Aruba sin turista, cu Taxistanan, Busnan y Tourbusnan no ta cumpra e cantidad di combustibel manera normal, cu sin duda tin un impacto pa e stacionnan cu a sintie mesora den nan entradanan. E compania cu ta bende combustibel por mayor tambe a nota un caida den nan benta, pasobra e stacionnan ta cumprando menos combustibel, debi cu nan orario di operacion tambe ta limita e ultimo lunanan. Esey banda di e realidad cu entretanto prijs di combustibel a bolbe aumenta, net memey di e crisis economico aki, cu tambe ta haci cu chauffeurnan ta purba stuur menos pa gasta menos combustibel.
Mas stacion di combustibel lo habri den e siguiente simannan
Un fecha exacto pa apertura ainda no tin, pero locual antes tabata Texaco Cura Cabay, situa net banda di Wendy’s, ta den proceso avansa di renobacion y ampliacion. E grupo cu ta opera Paradera Gas Station Aruba a tuma e propiedad over. Na e momento aki nan ta den pleno boramento pa acomoda un tanki grandi di combustibel bou tera. Despues di esey lo caba cu e infrastructura bou di e dak pa acomoda e tankinan y e oficina. No ta conoci si lo aplica e mesun formula moderno manera na Paradera, den cual e cliente mes por “swipe and go”, sin cu mester un trahado pa yena e tanki pa nan.
Lo bin un stacion nobo riba Ser’i Tijshi
Manera ta conoci, Gobierno a duna permiso recientemente pa un stacion nobo di combustibel riba Ser’i Tijshi. Riba su mes esey lo bira un establecimiento completamente nobo y sin duda lo kita cliente for di e stacionnan den vecindario mes. Green Corridor a bira mas uza ultimamente debi na e infrastructura nobo y moderno cu a traha den cual a reduci e tempo cu automobilistanan ta pasa riba e caminda. Dor cu 4 auto por core bandi otro, a pone cu e autonan ta yega nan destino mas lihe, sin fila y sin estorbo. Riba e caminda nobo aki mes no tin ningun stacion di gasolin. E doño nobo ta vincula cu e mesun di CITGO Palm Beach.
FMSA ta encarga cu importacion y benta di combustibel na Aruba
Benta di combustibel na Aruba ta data desde decadanan atras, for di tempo di Refineria Lago. Cu tempo a separa e trabaonan di refina petroleo for di e compra y benta di gasolin, diesel y jetfuel na comunidad. Despues di Lago e compania a sigui bou di e nomber di Esso Petrolera te ora cu Coastal Refinery a tuma e refineria over. E tempo ey, na aña 1995 a yama e compania Coastal Aruba Fuels Company (CAFCO) y desde aña 2009, despues cu Valero a tuma e refineria over, a yama e compania Valero Marketing & Fuels Supply Aruba (VMSA). Desde dia 1 di october 2016 a bin cambio atrobe y awor e compania yama Fuels Marketing & Supply Aruba, FMSA y su unico doño ta Refineria di Aruba. E compania ta conta cu un flota di 13 truck grandi cu ta transporta combustibel pa e stacionnan situa tur rond Aruba, mientras nan tin 6 truck mas chikito cu ta opera na Aeropuerto, unda nan ta bende jetfuel cu e avionnan. Na tur FMSA ta conta cu mas o menos 40 empleado, bon prepara y capacita pa maneha mas o menos 200 miyon liter di combustibel pa aña. Desde 1 di october 2016 nan operacion a bira mas grandi ainda, awor cu FMSA ta encarga pa bende “Fuel Oil” cu WEB.
FMSA lo bende dos tipo di gasolin
E compania Fuels Marketing & Supply Aruba (FMSA) ta pertenece 100% na e compania Refineria di Aruba cu ta pertenece 100% di Gobierno di Aruba. Nan tabata conoci bou du VMSA tempo di Valero pero Gobierno a tuma e operacion over na caminda y como tal benta di gasolin, diesel, jetfuel y combustibel pa WEB por produci awa y coriente a bin den man di pueblo. Pero, Gobierno a topa cu un reto politico sin spera. Den pasado ki ora prijs subi, e partidonan politico ta acusa otro di tin di haber cu esey. Awor a nota cu e prijsnan ta varia debi na tendencianan internacional y cu Gobierno no tin ningun influencia riba con e prijs ta subi of baha. Cu e realidad amargo aki den mente y dificil pa bende politicamente a opta pa introduci un di dos producto di gasolin na Aruba. Nos lo bay bek na e sistema di antes, unda nos tabatin gasolin “super” y gasolin “unleaded”. Claro e “super” ta un poco mas barata pero ta di un calidad inferior cu e otro.
Pero e cambio ta resulta mas dificil cu hopi a spera. E ta rekeri un inversion miyonario di parti di FMSA y di e doñonan individual di e stacionnan di gasolin pa nan tin un tanki adicional. E lo encera cu mester coba un buraco grandi pa acomoda un tanki adicional grandi di combustibel pa por almacena e otro producto. Aunke cu a pensa cu e producto lo haci un diferencia grandi, toch e ta mustra cu ta algun cen e lo diferencia pa cada liter.
