Ministernan di Gabinete Wever-Croes II a reuni diamars pa prome biaha den e constelacion nobo despues cu dialuna ultimo a huramenta dilanti Gobernador interino, Yvonne Laclé -Dirksz. Prome decision di e Conseho di Minister di Gabinete Wever-Croes II a tuma tabata di ratifica e nombracion di 20 di November 2017 den cual Guillfred Besaril ta mantene e funcion di Minister Plenipotenciario di Aruba na Hulanda.
Esaki ta haci cu Minister Besaril ta bira e prome politico cu ta ripiti den funcion di Minister Plenipotenciario mesora tras di otro, despues di 23 aña. E prome y unico politico cu a sinta un di dos periodo como Minister Plenipotenciario tabata Mito Croes (dfm). E ta esun di mas largo tambe te awo, esta shete aña sigui. Mester menciona cu Ella Tromp-Yarzagaray a sinta parti di un periodo y despues di algun aña un termino completo.
“E hecho cu mi ta bolbe den e funcion ta muestra di e importancia den e continuidad den e relacion cu Madre Patria. Mester di trankilidad y stabilidad den e relacion den Reino na e momentonan aki. E aspectonan aki a hunga un papel importante pa Conseho di Minister y pa cual a keda dicidi cu mi persona ta esun indica pa enfrenta e retonan na e momento aki den Gabinete Evelyn Wever-Croes II”, asina Minister Besaril a declara.
Tabata presente na e ceremonia special aki, casa di Minister Besaril, su dos yuinan, su tata cu recien a cumpli 80 aña y su dos ruman hombernan.