Departamento di Labor pa di 7 aña consecutivo ta bay ta conduciendo su encuesta di forsa laboral. E encuesta di forsa laboral aki a cuminsa dia 3 di November y lo caba fin di luna dia 30 di November, segun Jason Lejuez, kende ta hefe interino di e departamento di investigacion di Departamento di Labor.
E encuesta aki ta uno sumamente importante pa Aruba, pa cual rason tambe por conta riba e partnernan manera Banco Central y tambe CBS.
Kico e encuesta ta?
E encuesta aki ta un encuesta cu lo wordo conduci bao di hogarnan na Aruba, cu e meta pa haya un bista actualisa di e mercado laboral di Aruba, como tambe pa señala desaroyo y trendnan den nos mercadonan.
E resultado di e encuesta aki ta sirbi pa informa pueblo como tambe pa suministra cu cifranan relevante na gobernantenan, sector publico, na sector priva, pa asina di nan banda, cu e cifranan aki, nan por duna forma y contenido na nan maneho.
Un di e cifranan mas importante cu ta midi cu e encuesta aki, ta e cifra di desempleo pa Aruba. E resultado di e encuesta aki tambe lo ta e cifra oficial pa Aruba. Manera cu ta haci’e ta segun e standardnan internacional. Metodologia ta standarisa. Loke tur pais na mundo ta haci pa asina ora cu compara e cifranan di Aruba, cu exterior, ta comparando e mesun cos. Pesey tin e manera cientifico aki pa por bin cu un cifra pa e mercado laboral.
Fuera di e cifranan di desempleo, tin otro indicadornan cu tambe por saca for di e encuesta aki entre otro, e grado di participacion. Esta cuanto hende ta participando na e mercado laboral. E cifra di desempleo pa hobennan, cu tambe ta algo hopi pidi.
E encuesta aki, ta algo sumamente importante pa e pais. E aña aki, meta ta pa entrevista 2000 adres na Aruba. Ta calcula cu ta mas of menos un 4500 persona na Aruba, di 15 aña of mas. E adresnan cu lo wordo bishita ta adresnan cu ta wordo scogi na manera arbitrario (randomly). Tur adres na Aruba tin e mesun chens di wordo scogi den e encuesta aki.
Aparte cu ta anuncia cu e encuesta ta bay cuminsa, tambe ta pidi un biaha mas na pueblo di Aruba, mirando cu esaki ta di 7 biaha cu ta haci’e, pa un biaha mas, duna e cooperacion, pa duna e tempo na e encuestadornan, pa asina nan por haya e informacion valioso aki, pa asina Aruba tin su cifranan pa e por compara su mes internacionalmente, pero tambe suministra maneho y informa e pueblo.
