Por a mira cu Scol di polis, aunke ta fin di siman, klasnan ta yen di hoben cu interes pa bira polis. Roberto Brown kende ta docente na scol di polis, a splica cu diasabra a spera 105 mucha cu a solicita pa bira polis, pero 17 no a presenta. No sa e motibo pakico nan no a bin scol. Tin 5 klaslokaal y nan ta completamente yen. Tin basta hende cu pasion pa bira polis.
Encuentro cu scol
Esaki ta e prome test cu ta yama e Raventest. Ora cu nan caba e test aki, nan ta sigui pa e di dos etapa, cual ta e idioma Hulandes.
Duracion di test
Segun Brown, esaki no ta complica. Kier wak nan inzicht cu nan ta wak ta hopi figura, seña, nan tin cu distingui cua ta bon, cua ta malo. Eynan caba ta e prome. Bo ta wak si nan tin inzicht cu tin cu capta lihe como agente policial.
Resultado
E alumnonan a haya 40 minuut pa haci e test y ta wordo coregi pa 2 funcionario cu ta traha na In Top. Na Scol di Polis nan kier ta neutral y profesional y ta prefera pa un compania independiente haci e test. E docentenan mes ta tene supervision pa tur cos bay manera mester ta y nan ta haya e resultado di biaha pa wak si nan ta sigui pa e siguiente etapa of no.
Si cos bay robes
Si cos bay fout, tin e chens di aplica un biaha mas pa otro aña, pa klas 2019. Loke ta bezig cun’e, ta pa 2018. Si bay malo, semper tin un aña cu bo por purba atrobe. Nunca ta cera porta pa ningun hende.
Interes
Pa loke ta e interes di 88 hoben, ta mustra cu tin hopi hende eyfo cu ta desea di bira polis, pa sirbi nan pais, nan comunidad. Pa Scol di Polis, e ta algo hopi bon. Si tabata menos cu esey, por pensa cu algo por a bay robes. Nan ta hopi contento cu e response.
Grupo
E grupo tabata mas grandi. Ta exigi cierto documentonan. Nan mester tin MAVO diploma. Nan mester ta inscribi, nan mester tin nacionalidad Hulandes. Tin hopi cu a bin cu no tabata tin e rekisitonan adecua y lamentablemente mester a bisa cu nan no tabata por.
Fase
Segun sr. Brown, e alumnonan mester haci e test di Hulandes. Despues di esey nan tin cu haci e sporttest. Despues di esey tin e antencedentenonderzoek, unda nan ta bay bishita e muchanan aki y wak con nan ta biba, cu ken nan ta anda. Despues di esey tambe tin drugtest, tin test di salud y na final tin e gesprek, unda cu nan lo sinta combersa cu basta hende di caliber, unda cu nan lo bay tuma e decision, si nan ta adecua pa bira agente policial.
Cuanto tempo e proceso ta dura
Semper ta streef pa caba mas lihe cu ta posibel. Na Mei of Juni. Pasobra un klas mester cuminsa na Augustus. Pero tin biaha cosnan ta bin mientras tanto cu ta for di alcanse, pero ta purba pa caba hopi tempran. Tin hende tambe cu ta trahando y cu ta cambia di trabao y nan mester tin nan opzeggingstermijn.
