Den un luna investigacion forensico na HOH ta cla

Te ainda no tin un resultado final di e investigacion na Laboratorio di Hospital unda cu denuncia publico a wordo haci di fraude cu a tuma luga. Den combersacion cu Minister di Salubridad Publico Dangui Oduber, el a confirma cu investigacion ta andando y e personanan concerni ainda no a reanuda trabou.

E mandatario a ordena un investigacion (quick scan) espues di denuncianan publico di fraude y malversacion den e laboratorio na hospital. A base di informacion ricibi den e quick scan, a dal e siguiente paso cu tabata e investigacion forensico. For di inicio a bisa cu e investigacion forensico lo tuma rond di 3 luna, pues nan tin un luna mas pa finalisa e parti aki.

Den un luna investigacion forensico na HOH ta cla

Den un luna investigacion forensico na HOH ta cla. Click link pa mas https://24ora.tv/2Bq3e9n

Posted by 24ora on Tuesday, October 15, 2019

Pa e investigacion por tuma luga di un forma independiente, a schors e personanan cu ta sospecha di ta envolvi. Si resulta na final cu cosnan incorecto a tuma luga y e personanan ey ta envolvi, mester entrega un keho penal pa “wordo persigui penalmente pasobra no por t’asina cu negoshi ta wordo haci cu salud di hende. Esey ta loke tabata pasando.”

El a splica cu testnan cu supuestamente a wordo haci na Hulanda y paga p’e, a resulta di a wordo procesa aki na Aruba mes. Pues a traha riba nan despues di oranan di trabou aki na Aruba. Pero no mas tarda aki 4 siman mester tin claridad,” e mandatario a bisa.
Na final nos lo haya si e acusacionnan tin base of no.