Tur kwartaal Banco Central ta observa e Tourism Receipts (Tourism Credits), cu ta mustra e cantidad di placa cu turismo ta trece pa nos economia. Aruba Tourism Authority (A.T.A) a pone como meta pa yega recuperacion di 95% pa e indicador aki den 2022. Recientemente, Banco Central a publica e cifranan di e ultimo kwartaal di 2022. Esaki ta ilustra un recuperacion di 118% den Tourism Receipts na 2022 compara cu 2019!
Mester enfatisa e importancia di e indicador aki pa loke ta trata recuperacion di nos turismo, mirando cu e ta un di e indicadornan cu ta ilustra, no e cantidad di bishitante cu a bin Aruba, pero e cantidad di placa cu ta genera a traves di nan bishita. Tourism Receipts ta e entrada directo genera pa medio di turismo y ta exclui e entrada indirecto cu Aruba su economia ta genera danki na e industria turistico.
MAART 2023 DEN COMPARACION CU 2019 y 2022
Den luna di maart 2023 nos destinacion a ricibi un total di 109,295 bishitante “stay-over”. Si compara luna di maart 2023 cu maart 2019 – cu tabata e ultimo aña normal di turismo, por mira cu Aruba a recupera 102% di locual a ricibi na maart 2019, cu ta indica un crecemento di 2%. Si compara maart 2023 cu maart 2022 por mira un recuperacion di 114% cu ta indica un crecemento di 14%.
MERCADONAN Y CATEGORIANAN DI ACOMODACION
Den maart 2023, un total di 84.8% di e bishitantenan “stayover” pa Aruba a yega for di Norte America, 5.7% a bini for di Europa, 7.2% a yega for di Latino America y 2.3% tawata procedente di otro partinan di mundo. Mirando e categorianan di acomodacion, den maart 2023 36.6% di bishitante a keda den hotelnan High-rise, 8.9% a keda den hotelnan Low-rise, 25.2% a keda den Timeshare y 29.3% a keda den otro tipo di acomodacion, conoci tambe como vacation rentals.
VACATION RENTALS
Ta importante pa menciona cu A.T.A. tin acceso na un plataforma unda por wak e cantidad di cas, apartamento y villas uza como vacation rentals como tambe e prijs averahe pa anochi, e ocupacion y un calculacion di e entrada cu esakinan ta genera. Si compara maart 2023 cu maart 2022 por mira cu e prijs averahe di e acomodacionnan aki a subi cu 12%, for di un prijs averahe di $237 pa anochi na maart 2022 pa un prijs averahe di $266 na maart 2023. Si compara maart 2023 cu maart 2019, por analisa cu e prijs averahe di e acomodacionnan aki a aumenta cu 45%, for di un prijs averahe di $184 pa anochi na maart 2019 pa un prijs averahe di $266 na maart 2023.
Vacation Rentals | |||||
2019 | 2020 | 2021 | 2022 | 2023 | |
ADR | $184.00 | $200.00 | $220.00 | $237.00 | $266.00 |
Occupancy | 43.6% | 35.6% | 45.6% | 63.7% | 62.7% |
Revenue | $7,427,712 | $5,312,008 | $8,819,847 | $15,317,752 | $18,982,857 |
Source: A.T.A. (Transparent) |
Si compara maart 2023 cu maart 2022 por mira cu e ocupacion averahe di e acomodacionnan aki a baha cu 1 punto di porcentahe, for di un averahe di 63.7% na maart 2022 pa un averahe di 62.7% na maart 2023. Si compara maart 2023 cu maart 2019 por ripara cu e ocupacion averahe di e acomodacionnan aki a crece cu 19.1 punto di porcentahe, for di un averahe di 43.6% na maart 2019 pa un averahe di 62.7% na maart 2023.
Den caso di entrada, si compara maart 2023 cu maart 2022 por mira cu e categoria a genera un crecemento den entrada di 24%. Si compara maart 2023 cu maart 2019 por wak cu e categoria a genera un crecemento den entrada di 156%.