Un turista kende recientemente tabata na Aruba a pasa den un situacion malisimo, unda el a bira victima di ladronnan cu no solamente a bay cu su placa efectivo, pero tambe materialnan cu balor masha halto mes.
Di e forma el a duna su relato di loke a pasa cu ne aki na Aruba,a su cas na Opal.
“Dia 4 di januari, 2021 mi a sali di mi cas na Aruba pa cumpra algo pa come. Mi tabata cenando mi so na Blossoms na Aruba y a haya yamada di e compania di alarma Smart System pa informami cu e alarma a bay “on” na mi cas riba e isla. Nan a splicami cu tin movecion den cushina, sala y camber. Mi a puntra nan si a yama polis. No tabata mucho si nan a yama polis prome cu mi a puntra of no. E yamada aki mi a ricibi rond di 9:15 PM.
Mi a yega i cas shete minuut despues pa topa cu oficialnan di polis na mi cas. Na momento cu mi a drenta, mi a mira marca di pia tur den cushina, pasa den gang cu ta bay pa e camber principal. E oficialnan a pidimi tira bista pa mira si tur cos ta na ordo. Na momento cu mi a drenta e closet di mi camber mi a realisa cu nan a bay cu e caha fuerte completo for di e muraya den e camber principal y di e closet. Den e caha fuerte tabatin tur mi joyanan, mi cartera, mi paspoort y otro cosnan personal. Pero tambe credit card, potret y 7500 dollar cash.
Polisnan tabata e anochi ey na mi durante mas o menos dos ora y mey. Despues di e shock inicial cu nan a bay cu henter e caha fuerte di e muraya, nan a consehami pa bay bek den mi closet y si mira no falta nada otro.
Canando direccion di mi closet mi a realisa cu mi dos maletanan Louis Vuitton tambe a disparce. Un di nan tin un balor di riba 7 mil dollar.
Polisnan a mira e video. E ladronnan tabata den mi cas pa aproximadamente dos minuut cu nan a drenta y sali. Nan tabata sa kico nan tabata haci y nan sa kico nan a bin busca.
Mi bisiñanan a bin na e cas yudando mi den e situacion fastioso aki. E polisnan a bolbe e siguiente dia, 5 di januari, 2021; e compania di alarma a bini e siguiente dia y a graba e video di e ladronnan bulando e muraya y drenta mi cas.
E Recherchenan a bolbe diferente biaha dia 5 di januari pa papia cu mi. E ladronnan a bay cu mi paspoort y mi mester a conta Embahada Mericano. Nan a instruimi busca un carta for di polis pa mi por bula dia 6 di januari. Mi a bolbe Merca dia 6 di januari y mi ta programa pa ta bek na Aruba dia 15 di februari, pendiente pa mi haya mi paspoort na tempo.”
Te aki e declaracion di e turista, kende tabata hopi afecta ainda pa loke cu a pasa cu ne, mas ainda con e ladronnan asina lihe por a bay cu cosnan di e cas.
