Fortaleza pa Famia

Nos pueblo ta chikito, cada dolor ta grandi pa nos, cada biaha cu maldad ataca tur hende ta sinti, pasobra no ta facil locual ta pasando riba e isla aki, ta p’esey nos ta recomenda e pueblo aki pa lanta ariba, demostra curashi y haci oracion un pa otro, pasobra ta nos tur ta prohimo.

Den 2 Timoteo capitulo 3  bijbel ta papia di tempo trabahoso, y esaki ta un spiertamento pa nos, pa nos acerca Dios, entrega nos bida na Dios , y asina nos por wordo di spaar den e tempo aki.

Un tempo cu ningun hende por a spera cu maldad lo avansa di un forma incontrolabel pa mente humano, pero pa Dios si e ta bao di control, y si nos acerca e trono di Dios cu frankesa Dios lo lanta su man y yuda nos, pasobra el a priminti cu e lo hacie, y Dios ta cumpli cu su promesa.

Hopi biaha ora situacion dificil presenta , nos ta busca tur tipo di excuus pa sconde tras di dje, tur tipo di formula, pa asina por acusa otro, en bes di yega cerca Papa Dios y bisa Señor nos tin mester di bo como isla, como pais, Señor bo a priminti cu bo no ta bandona nos, Señor wak e situacion cu nos ta pasa aden y rek bo man y yuda nos, pasobra sin bo ayudo nos lo no sobrevivi .Mescos cu ora un persona ta malo e ta acudi na dokter pa ayudo pasobra e tin hopi dolor, asina e pueblo aki mester acudi cerca Dios pa ayudo pasobra e dolor ta pa nos tur.

Nos kier hala atencion di nos hubentud, pa nan recorda, cu mayor ta haci tur cos pa bo lanta den e bon caminda, ora bo ta chikito, ta tene bo man hibabo Iglesia, scol, etc. Pero ora bo bira grandi ta bira tempo pa bo practica lo cual bo a ricibi di bo mayornan , y no bandona locual bo a ricibi di bo mayornan, pasobra ora bo tabata chikito a tene bo man instrui bo e caminda, pa ora bo bira grandi bo cana den dje. Pero awor tin influencia di libertinahe , y maldad ta hala muchanan y hiba nan den mal caminda. No ta tur locual ta pasa den hubentud ta culpa di mayornan, pasobra mayornan ta para riba nan palabra , pero tin portanan habri cu ta e mucha mes tin  di escoge cual e ta drenta, y eynan e mucha no tin di laga otro hende influencia su bida ni tampoco haci otro hende rico mientras e su bida lo por bira amarga , y hasta tin chens di perde su bida.

P’esey cu tur amor nos ta pidi tur habitante di Aruba pa uni den oracion, pasobra tin un par di gigante cu a lanta riba nos isla cu ta solamente cu poder di oracion nos por tumba nan, pasobra nos ta mira cu forsa humano nos no por domina. Awel nos mester acudi cerca Dios, pasobra locual ta imposibel pa hende ta posibel pa Dios. No ta tempo di haci wega, husga, hunga sabi , pero ta tempo di dobla rudia pa bo mes y pa bo bisiña.

Ta tempo pa yuda tira un bista un pa otro, bijbel ta bisa cu hende lo bira stimado di su mes, y nos ta mira esey ta sosode. Cu tin hende cu ta haci tur locual ta posibel pa logra nan meta aunke nan meta ta malo, y destructivo pa otro nan. Muchanan kier haci bon, pero hopi no por soporta e mal influencia cu tin den aire. Muchanan mester cuminsa scoge cu mas claridad nan amistadnan, pasobra si esey no tuma luga , nos lo tin mas lagrima den nos pueblo.

Muchanan mester aparta for di maldad, pasobra tin cos cu ta mustra lucrativo, atractivo, pero tras di dje morto ta na caminda.

Tur hende grandi mester bira consciente, cu nan deber di haci oracion constante pa nan yiu no ta envano, pero cu Dios ta scucha y Dios lo actua.

No tin otro conseho cu nos por duna cu no ta esun cu ta para skirbi den Mateo Capitulo 11 ver 28 te cu 30, pasobra no tin otro solucion permanente, cu un cambio di bida pa scapa bo bida.

Y solamente Hesus por ofrece bo un cambio di bida pa scapa bo bida, y tin hopi mayor cu tin testimonio grandi cu nan por papia cu nan yiunan, y bisa nan pa stop di play balente, stop di cera amistad cu gruponan cu ta cana den caminda di morto. Si e mayor no a cambia su bida awe e lo no t’ey pa conta.

E situacion ta tristo, y hopi lamentabel pa nos tur pasobra e comunidad ta chikito y e peliger ta grandi. Pero nos ta keda para riba e Palabra di Dios cu nada ta imposibel pa nos Dios.

Y  nos ta cera cu esaki, cu ta tempo pa cambia bida, pa asina scapa bo bida. Hesus a bisa bin cerca mi tur cu ta cansa y carga y lo Mi duna boso sosiego.

Esaki ta un solucion permanente y gratis cu ta kita dolor y preocupacion. E oportunidad t’ey y Dios su brasa ta habri ta spera abo, no tarda/