Minister di Asuntonan Economico, Comunicacion y Desaroyo Sostenibel, Sr. Geoffrey Wever a ricibi bishita di un delegacion procedente di Geneva, Suisa. Ta trata aki di Paul Dekkers kende ta Representante Permanente di Reino Hulandes na Nacionnan Uni estableci na Geneva. Dekkers tabata acompaña pa Audrey Goosen cu ta e Representante Permanente di Organisacion Mundial di Comercio – World Trade Organization (“WTO”) – na Nacionnan Uni tambe na Suisa.
Minister Wever a duna un elaboracion breve di e status y puntonan di desaroyo di nos economia. E mandatario a splica Dekkers y Goosens di trabounan andando pa atende cu e necesidad pa nos diversifica nos economia, mirando cu nos pilar economico prominente, turismo, ta vulnerabel den temponan di crisis mundial. E pregunta ta; den ki extenso e meta di diversificacion economico ta realmente alcansabel?
E pasonan cu ta tumando actualmente – y cu falta pa tuma ainda – mester resulta no solamente na un aumento di nos GDP, pero tambe mester refleha den e poder di compra di e consumidor. Mirando cu nos ta un pais cu ta importa inflacion, e asunto di stipulacion di prijs ta un punto di reto constante aki na Aruba.
Ademas di e posicion di e consumidor a toca temanan di empresanan mediano y chikito, esta temanan den area di e.o. obtenibilidad di prestamo, entre otro den forma di microcredito. A pesar cu tin un cantidad considerabel cu ta pertenece na e grupo aki, financiamento ta keda un reto pa desaroyo.
Aruba por bin na remarca pa fondonan di organisacionnan internacional cu ta forma parti di e lasonan di UN y WTO na Geneva. Pa medio di contactonan cu Minister Wever a haci, Den Haag tambe a yega di expresa e boluntad di sostene Aruba den e realisacion di proyectonan sostenibel, pero cu Aruba lo mester indica claramente kico e mester, semper y cuando hustificando cada propuesta a corto y largo plaso.
Dekkers a haci e pregunta acerca di e conscientisacion di nos hendenan na Aruba di loke ta trata desaroyo sostenibel y tambe di e cambio climatico. Esaki no ta na e nivel desea ainda, pa cual mester sigui traha duro na e educacion y conscientisacion di nos hendenan di con pa tuma un rol mas activo den sostenibilidad di nos isla, segun minister Wever.
