Gobernador di Aruba, Alfonso Boekhoudt, ayera mainta a haci entrega oficial di un Decreto Real (Koninklijk Besluit) na dos marinier Rubiano na honor di nan promocion na Marinierskazerne na Savaneta. E entrega a tuma luga na Cas Ceremonial di Gobernador. Art van Beekhuizen, Comandante di Marinierskazerne, tambe tabata presente na e ocasion aki.
Richard F. Kelly a ricibi su Decreto Real den cuadro di su promocion cerca e personal militar di Aruba di ‘eerste luitenant der mariniers van Aruba’ pa ‘kapitein der mariniers van Aruba’. Daniel M. Vrolijk a ricibi su Decreto Real, den cuadro di su nombracion como officier cerca e personal militar di Aruba den e rango di ‘tweede luitenant der mariniers van Aruba’ .
Despues di e entrega oficial, Gobernador di Aruba a tene un audiencia cu señor Van Beekhuizen. Durante e audiencia, Gobernador a haya informacion riba diferente topico, entre nan e trayectonan di profesionalisacion di militarnan Caribense y e trayecto di formacion social.
