E fin di siman aki ta bay tin e Vacunathon number 2, e campaña nacional contra COVID-19. Lo ta na Teresita Center na San Nicolas, Centro Libertador Betico Croes na Santa Cruz, Club Don Bosco na Noord y Ritz Carlton tambe na Noord, for di 9’or di mainta pa 4’or di atardi nonstop.
Ta invita un y tur pa pasa na un di e localidadnan aki pa nan di dos dosis di e vacuna y pa tur otro persona cu no a vacuna ainda.
Despues di e Vacunathon ta bay cambia maneho. Ta bay cuminsa ‘schaal af’. E localidadnan aki ta grandi y no por sigui mantene nan mas. Poco poco ta bay bek na normalidad caminda cu na DVG lo duna vacuna riba cita.
Tambe nan lo ta den bario cu unidadnan mobil pa yega na esunnan cu kier vacuna.
E unidad mobil ta bin na empresanan riba invitacion di e doñonan di trabao. Ta bay na casnan pa esunnan cu no por move facilmente.
E trailer medico ta bay den bario y parokianan pa esunnan cu ta haci nan diligencianan tambe por tin chens di vacuna.
E di dos Vacunathon aki ta un momento particular pa vacunacion. mas di 7000 ciudadano a acudi y a haya nan vacuna y ta spera cu nan acudi e biaha aki tambe.
Ta pidi pa tur esunnan cu bay vacuna, pa convence famia, amigo of conoci pa e tambe tuma su vacuna.
Ta mira hopi beneficio den e vacuna y asina por flexibilisa e medidanan.
E reto ta pa yega na un grado di vacunacion mas halto.
Na e momentonan aki e pandemia a costa 105 bida. Ta pidi pa por yuda pa no perde mas hende den e pandemia aki.
Tres siman pasa, a indica cu e fin di e pandemia ta na bista. Y cu e Vacunathon aki ta mas cerca. Mas di 58 mil persona a vacuna y ta mira e efectonan positivo.
Rekisitonan pa bin cu bo carchi di AZV of bo detayenan den e Aruba Health App. Tambe pa esunnan cu no ta documenta, nan mester tin 6 luna na Aruba y un paspoort pa por haya nan vacuna.
Pa esunnan cu tin duda lo tin dokter presente cu por duna un splicacion y purba convence bo pa bo tambe haya e vacuna.
Pa mas detaye lesa matutino TREMPAN
