Den e declaracion nan di diferente mandatarionan Hulandes y Arubiano por nota un biaha mas contradiccion nan riba e situacion di Venezuela, como tambe hecho cu Minister Plenipotenciario ta mustra di ta interveniendo den e competencianan exclusivo di canciyer Hulandes.
“Den cuadro di e impasse cu Reino Hulandes, e islanan ABC ta aden cu Venezuela, mi a bolbe entrega un peticion na Presidente di Parlamento pa pidi Sra. Prome Minister Evelyn Wever-Croes pa duna un splicacion na Parlamento riba e desaroyonan aki. Mi a añadi algun pregunta ya cu den medionan di comunicacion nos a tuma nota di diferente declaracion, algun contradictorio entre Minister Plenipotenciario y tambe e canciyer Hulandes, Minister di Asuntonan Estranhero.
E preguntanan cu mi tin ta entre otro cu a nota contradiccion den algun articulo caminda a Sali uno di Minister Plenipotenciario caminda cu e ta bisa cu lo a yega na un solucion diplomatico, cu e representante economico na embahada Venezolano na Den Haag, anto pa su mañan esaki a wordo contradeci dor di e propio canciyer Hulandes.
Mi ta dirigi e preguntanan aki na Prome Minister ya cu su persona ta esun cu tin e responsabilidad politico den esaki. Un Minister Plenipotenciario no tin ningun responsabilidad politico ya cu e ta traha pa Minister President.
E mandatario cu a responsabel pa actonan di su Minister Plenipotenciario y esun cu mester duna cuenta na Parlamento ta e Minister Presidente.
Relacionnan exterior ta cay bou competencia di Reino y nos tin un Minister di Relacionnan Exterior di Reino kende ta sr. Zijlstra.
Nos tin cu mustra aki cu responsabilidad politico ta Minister di Asuntonan General ta carga esaki pa loke ta nos relacionnan exterior y relacion cu Hulanda, y Minister Plenipotenciario riba su mes no tin ningun responsabilidad politico y pesey nos ta canalisa e preguntanan aki na Prome Minister,” Parlamentario Richard Arends ta mustra.
“Mi pregunta na Gobierno lo ta si tabatin un ‘afstemming’ entre Prome Minister, kende ta responsabel pa Minister Plenipotencario, pa e acercamento aki, hunto cu Ministerio di Asuntonan Exterior Hulandes. Tambe mi a puntra Prome Minister si e solucion diplomatico aki, en berdad ta un paso mas cerca pa elimina e blokeo cu tin vigente.
Preguntanan cu nos tin como Parlamento cu nos ta considera valido,pa motibo cu nos ta nota cu na mas c’un ocasion cu tin contradiccionnan cu a tuma luga den pasado manera e ‘aanwijzing’ cu gobernador di Sint Maarten a haya pa loke ta destitucion di e gobierno anterior di Sint Maarten, nos como miembronan di Parlamento hunto cu coleganan miembro di e comision di asuntonan exterior como di Reino, nos kier haya mas informacion y aclaracion di Gobierno.
Entretanto Gobierno a contesta esakinan,” Parlamentario Richard Arends ta mustra.
