Ta premira cu e decision di CITGO Aruba pa “slow down” nan operacionnan den e refineria sin duda lo tin batayanan legal den Corte como consecuencia. Ta spera casonan di e trahadonan, sea via nan sindicato of direct contra nan contratista local. E contratista lo entama caso contra VEC, cu ta e contratista principal di e consorcio. E ultimo aki lo entama caso contra CITGO Aruba pa a kibra nan contract den forma abrupto.
For di momento cu CITGO Aruba a anuncia e “slow down” y e consecuencianan cu esaki ta trece cune, mesora abogadonan a cuminsa prepara pa batayanan legal den Corte. E ta un cadena di consecuencianan pero cu na final ta caba na CITGO, kende a cera contract y acuerdonan bou e creencia cu e lo haya financiamento pero no a logra te awo debi na e prohibicion impone dor di Gobierno Mericano pa fia placa na cualkier compania di of liga na Venezuela.
CITGO tabatin fiansa completamente cla caba, faltando algun detaye minimal, ora cu Presidente Donald Trump a anuncia su decision pa prohibi companianan Mericano di haci negoshi cu Venezuela.
Na Aruba, e consorcio di Y&V y Technip a lanta un NV nobo cu yama VEC cu ta esun atendiendo cu e contratistanan local. Di nos informacion, ayera mainta VEC a ricibi un yamada bisando cu CITGO a cancela nan contract de inmediato. Merdia nan a haya e carta den nan man, cu a pone cu di nan banda tambe a sali un carta mesora pa e contratistanan.
Pa e contratista VEC, si CITGO kibra contract abrupto asina riba nan, no ta laga otro opcion pa nan haci mesun cos, pasobra di un dia pa otro nan tambe ta perde nan unico entrada. Es mas, e contract cu e contratistanan local ta pa proyecto y den dje tin un clausula cu ta papia di por kibra e contract cualkier momento dor di “force majeure”. E hecho cu CITGO no por haya financiamento, no pasobra e compania no ta bon, sino pa un decision unilateral di Gobierno Mericano, ta haci e situacion di e bira for di nan alcanse.
Claro cu cada compania, for di e trahado pa e contratista local, pa e contratista Venezolano, pa e consorcio y finalmente pa CITGO, lo mira e situacion aki diferente y lo purba busca nan derecho den Corte. Den esaki e declaracion di Minister Glenbert Croes cu no lo duna permiso pa kita e trahadonan di trabou no tin ningun base legal pasobra Hues lo mira e situacion di e compania prome, mientras cu e politico ta mira voto!
E compania VEC ta conta cu asistencia legal di abogado mr. Ronnie Wix pa tur nan asuntonan laboral, mientras cu CITGO ta conta cu sosten legal di Bufete di abogadonan Kloes & Partners.
