Diasabra 15 di october tabata dia internacional di e garoti blanco strepi cora. Manera ta conoci, tur aña durante e siman aki Fundacion Arubano di esnan Visualmente Incapacita (FAVI) ta percura pa organisa diferente actividad. “Aña pasa den luna di october FAVI a bishita Parlamento di Aruba y como parlamentario mi a probecha di e oportunidad pa asina combersa cu e clientenan”, asina Darlaine Guedez-Erasmus, miembro di Parlamento di Aruba pa fraccion di MEP a indica.
“Den combersacion mi a haci nan e pregunta kico ta puntonan di atencion cu nan ta desea di wak mehoracion a corto plaso y a largo plaso. Algo cu a resalta hopi ta nan gana y necesidad pa ta mas inclui den comunidad door di por ehempel ta mas independiente. Specificamente nan a menciona cu pa e parti di transporte publico nan ta haya hopi dificil pa sa ki ora nan ta yegando nan destinacion. Nan tin e deseo di por tin un miho guia den e bus, pa asina sinti siguransa pa cu uzo di bus tambe”, segun e miembro di Parlamento a enfatisa.
Di e forma aki Guedez-Erasmus a tuma su posicion como parlamentario pa vocifera e deseo aki na esunnan concerni, unda cu durante un conferencia di prensa aña pasa a haci e peticion na Arubus pa fortifica e participacion di tur ciudadano den comunidad pa loke ta trata uzo di
transporte publico.
E aña aki den e siman di garoti blanco strepi cora, Arubus a organisa un proyecto, un experimento social, acompaña cu 12 cliente di FAVI pa un guia, pa stop y subi un bus, cual tabata dunando servicio normal. Por a mira con atento e chauffeurnan tabata y tambe e otro pasaheronan den bus. Dispuesto na cada momento pa brinda apoyo na e clientenan si ta necesario. E proyecto aki a fungi como prueba, pa por averigua si Arubus mester haci algun ahuste of si ta dispone di tur rekisito pa asina brinda e miho servicio posibel pa personanan visualmente incapacita.
“Como parlamentario mi kier gradici Arubus pa mira e importancia y organisa e proyecto aki pa asina duna e personanan cu visualmente incapacita e confiansa propio pa haci uzo di transporte publico. Pa termina, ta importante pa analisa e recomendacionnan y traha riba nan
pa asina por ta safe pa tur persona visualmente incapacita y por core rond di Aruba manera tur otro ciudadano.”
