Asuntonan social, unda e hende ta central, mester keda topico di importancia, specialmente si ta trata di esnan mas vulnerabel den nos comunidad.
Sucedidonan hopi tristo y lamentabel aña pasa a sacudi nos comunidad y a alerta nos riba e necesidad pa herment/leynan cu por yuda nos contraresta e tendencia negativo aki den nos comunidad cu ta e abuso di menor y violencia domestico. Pa e motibo aki mi a haci sondeo den iniciativanan di ley existente pa wak con por acelera introduccion di algun di nan pa asina por yuda frena e desaroyo negativo aki.
A tuma over e iniciativa di ley di fraccion di MEP di 2010 pa introduci castigo minimo den
caso di abuso sexual contra menor y ta bezig pa traha riba e cambionan necesario pa asina e
ley aki por wordo trata y introduci teniendo na cuenta e diferente consehonan ricibi. Tambe a tuma over e ley di iniciativa di Sra. Monica Kock, tempo di fraccion MPA, cu ta trata un prohibicion temporal domestico pa asina brinda proteccion na victimanan di abuso domestico, un iniciativa di ley di 2007 cu falta algun cambio chikito pa por wordo presenta y trata na parlamento. Ambos ley ta conta cu sosten y cooperacion di Minister di Husticia, Andin Bikker, asina aki mustrando e compromiso di coalicion y e programa di gobernacion, unda e hende ta central.
