Bus a daña na entrada di Arubus

Diaranson mainta tempran, pasa di 5’or di marduga, na momento cu personal di Arubus tabata prepara pa subi caya pa duna servicio na scol y na comunidad di Aruba, un di e schoolbusnan a daña na entrada di cura di Arubus.

Esey a pone cu e otro busnan no por a sali. Na prome instante a kere cu ta algo intencional of ta welga tin, pero despues a resulta cu e tabata daña. E otro busnan dimes no por a sali y mester a habri un otro entrada mas p’ariba pa asina e otro busnan por a sali pa duna servicio. Esaki a trece dimes un tardansa, pero tur cos a normalisa despues. Unico cos ta, mester a maniobra cu e busnan, pasobra DOW tambe tin algun vehiculo grandi para den e cura ey. Ta net banda di e otro entrada y e busnan mester a maniobra pa sali. E mecanico tambe a yega e ora ey y a cuminsa traha mesora riba e bus cu ta daña y finalmente e porta principal por tabata liber un biaha mas pa e otro busnan.