Situacion di Aruba sigur ta hopi mas dificil cu gran mayoria di pais na mundo. E isla ta depende solamente di un sector economico, turismo, pa cual e sla tabata extra duro. Su recuperacion ta bira hopi mas dificil. Y si den esaki no ta haya e ayudo for di Madre Patria, manera cu lo a spera, e ta haci e situacion mas pio. Esaki por a sinti den e Cumbre di awe mainta entre Gobierno, sindicato y gremionan priva.
E impacto di kico e consecuencianan ta bay ta, por a sinti den e palabranan fuerte, pero real, di Daniel Ferrara, kende tabata e ultimo persona pa hiba palabra den e Cumbre cu a tuma luga den oranan di mainta na Renaissance Convention Center. El a representa Asociacion local di negoshinan den sector di “Food & Beverages”, esta “Aruba Food and Beverages Association” (AFBA). El a mustra e tristo realidad cu negoshinan chikito y di hendenan local por disparce por completo. “Nos ta compronde Aruba su dolor den e parti di autonomia, pero lamentablemente nos orguyo Arubiano no ta paga nos coriente, no ta paga nos awa ni ta pone cuminda riba mesa.”
E asociacion ta representa e poco mas di 200 negoshinan, local, cu ta emplea rond di 6000 persona. E riesgo aworaki, si no haya subsidio di salario ta cu e mas di 200 negoshinan a corto plaso ta disparce, bati bancarota, disparce for di economia local, cu lo keda completamente den man di companianan stranhero. “Aruba lo keda den man di stranheronan, di doñonan di negoshi stranhero.”
El a mustra riba e diferente encuestanan cu a tuma luga riba rednan social, y por a constata, segun Ferrara a bisa, cu 70% di e participantenan a acepta e condicion impone door di Hulanda, pa sigui brinda ayudo (prestamo) financiero, sin sa of compronde kico tur e ta encera. “Aruba y pueblo ta fada. Pero e realidad ta cu Reino ta pone cuminda riba mesa, Reino ta dicta.” E situacion actual ta hopi dificil, el a enfatisa, ya cu desde e crisis di Coronavirus, a bay atras caba cu 90%, ricibiendo e subsidio. “Nos ta perdiendo negoshinan, algun di nos a perde caba, y purba tapa e solo cu un dede ta un acto di ignorancia.”
