Minister di turismo Dangui Oduber hunto cu CEO di ATA, CEO di AHATA y Management Team di Aruba Airport Authority a ricibi e vuelo inaugural di JetBlue for di Newark, cu ta un vuelo directo. Apesar di e situacion cu nos ta aden cu COVID-19, JetBlue ta sigui demostra confiansa y compromiso cu Aruba. “No ta temponan facil, sinembargo JetBlue ta demostra e confiansa den Aruba como destinacion y gobierno di Aruba ta agradecido. Esaki ta un decision sumamente positivo y di aprecia,” esaki e mandatario a duna di conoce den un reaccion.
Aruba ta contento di por ta un di e destinacionnan scogi pa e aerolinea partner di 14 aña. Aruba a wordo identifica como un di e mercadonan cu jetBlue ta anticipa cu lo crece den demanda cerca e pasaheronan cu kier bay cu vakantie.
“Nos ta hopi contento cu jetBlue, nos aerolinea partner di 14 aña y actualmente e di dos carrier mas grandi pa Aruba a dicidi di expande su presencia cu vuelonan directo pa Aruba for di New York – Newark riba diasabra y diadomingo abordo di jetBlue su Airbus A321 neo. Ofreciendo tambe buelo for di Fort Lauderdale, JFK New York y Boston, esaki ta JetBlue su di 4 gateway pa Aruba como un di e destinacionnan esencial for di unda nan ta brinda nan servicio hopi exitoso “Mint” cu a wordo lansa na 2015 riba vuelonan selecta. Nos ta hopi sigur cu e servicio for di Newark lo ta un otro servicio exitoso mas riba e network di ruta di JetBlue.”
Actualmente JetBlue ta aerolinea Mericano cu ta trece mas turista for di Merca. Inicialmente JetBlue tabata tin planea pa haci 5 vuelo diario, pero pa motibo di e pandemia e plan a cambia. JetBlue lo tin 2 pa 3 for di Newark pa Aruba. Dentro di poco lo ta drentando un temporada di “high season” y gobierno di Aruba ta premira un temporada exitoso, mirando e reservacionnan na hotelnan y e cantidad di vuelo cu a bin ta aumenta pa e ultimo simannan. Si haci un comparacion di ora cu a habri frontera na juli te cu awo november, Aruba tabata ricibi na luna di juli, augustus y september 7 pa 9 vuelo en cambio e ultimo diasabranan Aruba ta ricibi mas di 20 vuelo for di Merca.
Diadomingo Aruba a ricibi 9 vuelo for di Merca y diamars 7 vuelo for di Merca. Gobierno ta satisfecho con e recuperacion di turismo ta bayendo. Esaki sigur ta yuda e situacion financiero, economico y laboral di Aruba dependiendo mas cu claro di e cantidad di casonan positivo na Aruba. “Nos ta bou di 10 caso pa dia averahe. Averahe postivo ta bou di 10%.
Siman pasa gobierno di Hulanda a cambia Aruba su codering di oraño pa geel, esaki mester a sosode mas cu un luna pasa caba. Apesar cu Corsou su casonan tabata mas halto cu Aruba y su averahe positivo tabata mas halto cu di Aruba, Corsou su codering tabata geel y di Aruba tabata oraño. Esaki ta cambia e “reis advies” pa e turista Hulandes cu kier bin pasa vakantie na Aruba.
Gobierno di Aruba ta trahando duro pa recupera nos turismo y ta crea un perspectiva cu nos ta bay recupera nos turismo y nos economia. Minister Dangui Oduber kier a gradici tur su socionan: ATA, AHATA, Aruba Ports Authority (APA) pa tur e esfuersonan haci pa recupera nos turismo y asina crea entrada, stimula economia y percura pa nos tin trankilidad na Aruba. Noticia asina ta trece exito pa e economia di Aruba.”
