Team di clinica di Dialisis di HOH a bini hunto pa sorprende colega Cynthia de Graf. Nan a bis’e cu e tin cu acudi na un ‘zoom’ meeting pero asina cu el a drenta el a keda ‘speechless’ di mira asina hopi colega, specialista y Hunta di Directiva presente. Pues, un gran sorpresa unda cu el a keda den ‘shock’ pero masha agradecido na su coleganan pa cu e nominacion. Tur luna Horacio Oduber Hospital (HOH) ta reconoce un colega cu a resalta door di pone den ‘spotlight’ y pa luna di october 2023 esaki a keda den persona di Cynthia de Graf, nurse di dialisis.
Cynthia de Graf a cuminsa labora na Hospital na aña 2006 y na aña 2013 a start su specialisacion pa e bira nurse di dialisis. Te dia di awe e mes ta gusta guia e studiantenan cu ta specialisa y ta bay e miya extra pa yuda e studiantenan pa nan caba nan estudio. E ta compronde nan, tin hopi pasenshi y por splica bon. Pa su coleganan, Cynthia ta un bon ‘teamplayer’ unda cu semper e ta dispuesto pa yuda. E ta comunica bon, ta respetuoso y ta delibera hunto cu su coleganan pa y hunto por tuma un decision bon balansa.
Cynthia ta un persona cu por conta riba dje y ta un gran sosten pe departamento. E ta integro y ta sinti un responsabilidad grandi pa su trabou cu e ta tuma hopi na serio. Tanto na hemodialisis, dialisis peritoneal y tambe dialisis agudo. Banda di esey e tin bon experiencia pa loke ta ‘roosterplanning’ y e tin bon bista riba e schedule. Por acerca Cynthia cualkier momento y por conta riba su confiansa. E ta scucha y ta keda semper trankilo. Tanto pashent como colega ta balora Cynthia masha hopi.
Bunita di Cynthia ta cu e por convence e pashentnan pa sigui nan tratamento di dialisis y sigui pensa positivo. Cynthia ta conoci pa ta e persona cu ta considera e ‘safe haven’ di e departamento unda cu su balornan sigur ta bay man den man cu di hospital. Hunta di Directiva, management y e coleganan ta contento di tin Cynthia den nan team. Masha pabien Cynthia!
