Hulandes likida na Corsou a “hit” Surnameo na Hulanda

Crimen no ta paga! Despues di e caso di likidacion na Corsou e siman aki dilanti un panaderia, mesora a sali informacion di e victima. Ta obvio cu a manda likid’e na Corsou, como un di dos intento, despues cu luna pasa a purba caba na Hulanda pero no a logra. Tur esaki tin di haber cu un cargamento di cocaina cu el a horta di un criminal grandi Surnameo na Hulanda. El a core bay sconde na Corsou, pero asina mes a gar’e y likid’e den auto sinta wardando su pareha busca un pan.

Genciël ‘Genna’ Feller tabatin apenas 23 aña, naci na Hulanda y tabata anda den baho mundo na Amsterdam-Zuidoost for di unda el a haya su mes ta huy. Na luna di augustus ultimo, ya caba e tabata victima di un atentado unda cu sicarionan a los nada menos cu ocho (8) bala riba dje di cual tres (3) bala a pega den su curpa te e dia di e di dos atentado e siman aki na Corsou.

Informacion ricibi for di fuentenan na Hulanda ta indica cu criminalnan Hulandes a bin ta siguiendo e pasonan di Feller ora cu e prome atentado riba su bida a fracasa. Awe mainta, net un dia despues cu a mat’e na Corsou, den e bario unda cu e tabata biba na Hulanda, personanan a pasa los tiro den laira, unda su famia ta biba ainda.

Mesora informacionnan a cuminsa los. Tin un tension pasobra e grupo di cual Feller tabata forma parti di dje, a horta un cargamento di algun shen (100) kilo di cocaina di un otro criminal Surnameño. Un cargamento cu ta bal miyones di Euro pa cual e grupo ta kere cu e asunto no a caba cu morto di Feller.

Dos atentado riba su bida
Manera ta conoci, dialuna mainta Feller tabata sinta den su auto dilanti un panaderia unda su pareha a baha cumpra pan, ora cu dos sicario hoben cu nan cara tapa, a los un arsenal di bala riba e auto cu e victima den dje. E no tabatin forma pa scapa. Tin un video di siguridad cu ta circula mustrando claramente con e dos personanan aki ta yega na e sitio, descarga e serie di balanan y despues huy rapidamente.

E situacion aki no ta algo nobo pa Feller, kende riba e anochi di 3 pa 4 di augustus ya caba a sufri un atentado. Nada menos cu ocho (bala) a los riba dje ora cu e tabata den e area di Dokkumlaan (Stedenwijk) na Almere. E tabata scondi na cas di amigonan. E resultado tabata cu dokternan no a logra saca tres bala, cu a keda den su curpa.

Motibo
Den circuito criminal ta core e informacion cu Feller hunto cu su gang a horta un cargamento di algun shen kilo di cocaina den area di Zuidoost y cual tabata bal miyones di Euro. E doño ta un criminal Surnameño pa kende e gang di Feller tabata traha. Nan mester a sconde e droga aki pero na su luga el a apodera di dje y despues a bay cune. E cos a bira sospechoso ora cu direpente Feller tabatin hopi placa y tabata cumpra articulonan caro. Asina ora cu Polisnan a tene un razzia na su cas, despues di e prome atentado, a bin descubri entre otro sapatonan di marca Louboutin cu ta costa riba 400 Euro. Y den Bijlmer e tabata un persona hopi stima riba caya. Pero esey no ta unico cos, pasobra door di su caracter violento, el a haya un prohibicion pa yega cerca di e cas di su amiga.

Detencion den tiroteo
E tabata envolvi of sospecha den otro caso grandi e aña’ki. Dia 18 di mei, Polisnan a detene Feller hunto cu su amiga den parkeergarage The Bank den Amstelstraat, despues di asesinato di Orphoeo Gefferie di 24 aña na Almere. Segun Polisnan a bisa e tempo ey, un amigo di Feller, Erxinio Luntungan, a mat’e y ta un fugitivo internacional. Despues di e asesinato ey, Feller, dos amigo y un amiga, a huy den un taxi. Pero hopi lihe nan a lague bay pasobra camaranan di siguridad a mustra cu e no a hunga realmente un rol den e sucedido aki,.

Na momento cu a comete e atentado riba dje den luna di augustus, a pensa cu e incidente na The Bank tabata e motibo, aunke autoridadnan ta pensa cu e storia di e droga horta ta un motibo mas real.

E historia di Feller no ta nada bunita ya cu den lunanan di zomer di 2017, e tabata dilanti mesa berde hunto cu algun amigo di Zuidoost, pa robo di tres Range Rovers y intento di robo di un di cuatro vehiculo. Tambe el a wordo husga pa maneha den un forma peligroso y bandona e sitio despues di un accidente unda tabatin herido.

Kico awo?
Su Abogado den un declaracion duna na Het Parool na Hulanda a spanta di e noticia y a bisa cu despues di e di dos atentado aki, ta haya un miho bista kico lo tabata e problema. Y cu apesar cu e tabata anda den e circuito criminal, e tabata un persona cu hopi bon sentimento. “Kisas si el a lanta den un otro bisindario, e lo no a tuma e decisionnan robes.”
Mientrastanto na Corsou autoridadnan no tin ningun indicacion di kende ta e sicarionan cu a ehecuta e likidacion di Feller.

Comments

comments