Den un esfuerso pa por cera conoci mas miho cu otro, pa sa e necesidadnan di otro y e forma con por traha hunto, miho y eficiente, a organisa un reunion recientemente na AHATA entre e Departamento di Agricultura, Cria y Pesca di Aruba (LVV Santa Rosa), hunto cu Departamento di Asuntonan Economico (DEZHI) y tambe cu e asociacion di hotel y turismo di nos isla. “E reunion a bay den masha bon ambiente. E ta e prome den varios cu lo sigui”, segun Tisa LaSorte ora nos a puntr’e con a bay cu e reunion aki.
Manera ta conoci, for di prome cu pandemia caba pero specialmente durante pandemia, e necesidad pa cumpra local, no solamente pa prijs pero tambe pasobra esey tabatin den establecimentonan, a haci cu mas y mas nos cunukeronan y agricultornan a activa pa presenta mas y miho productonan na pueblo. Awor cu nan a demostra nan derecho di existencia, cu productonan sostenibel, bon prijs y cu produccion consistente, nan ta cla pa conkista e mercado mas grandi.
E agicultornan, via e dos departamentonan di gobierno, esta Santa Rosa y DEZHI, kier convence e hotelnan y restaurantnan, via AHATA, cu nan por bira un partner importante di nan den nen necesidadnan alimenticio. Claro cu, specialmente pa hotelnan, ta necesario pa mantene un standard halto di calidad, produccion consistente y cu ta cumpli cu tur norma di HACCP. Esaki ta normanan internacional pa e forma con restaurantnan ta anda y warda productonan di cuminda. Door di mantene bo mes na e normanan aki, ta garantisa cu clientenan no ta bira malo debi na cuminda daña y na mes momento bo ta cumpli cu leynan internacional di siguridad y higiena di alimento.
Awendia agricultornan local pero tambe criadonan di bestia chikito y hasta piscadonan ta percura pa hopi producto cu facilmente por bende cu restaurantnan. Mira por ehempel con e industria di webo a crece grandemente riba nos isla e ultimo aña aki, den cual hopi hende ta opta pa webo fresco crioyo en bes di cumpra “webo di ijs” cu ta bin den container friu for di otro pais. Varios berdura tambe por haya local, planta y cultiva den e suela Rubiano mes. Djis cu, mescos cu por conta riba normanan di calidad halto internacionalmente, cu e cunukero local mester por adapta na e mesun reglanan aki si kier cuminsa bende cu e industria turistico.
