Despues di a lucha duro y largo cu tur e contratiemponan, diamars atardi laat Colegio San Agustin tabata cla pa duna resultado di examen na su studiantenan. Director Jeffrey Kelly a splica cu nan a opta pa duna e resultado practicamente den oranan di anochi, cuminsando casi 6’or di atardi. A uza e mesun estilo di drive-in, y cada klas a haya un orario pa yega hunto cu nan mayornan.
Nan ta pasa den e parkeerplaats unda cu nan ta ricibi nan cijferlijst y e felicitacion pasobra nan a gradua. E scol e aña’ki a logra cu 78% di e studiante a gradua. Nan ta spera cu den e siguiente tanda un otro grupo di studiante por logra gradua. Un total 62 studiante a pasa examen di cual 49 a slaag cu ta representa e 78%. Tin rond di 8 porciento cu studiante cu ainda por gradua.
“E ultimo simannan no tabata facil. Danki na tur e docentenan hunto cu a logra haci e ceremonia toch leuk pa e muchanan, incluyendo Massive FM cu a transmiti e resultado en vivo y 24ora.com cu a cubri e evento.”
