Andre Bosman: Na Aruba falta politiconan pa bay cera…den Serlimar!

Den Tweede Kamer a tuma luga e debate riba e ayudo financiero di Hulanda pa Aruba, Corsou y St. Maarten y tur esaki a relaciona cu e crisis cu Coronavirus a trece cu ne. Esaki ta tempo di solidaridad y den artikel 36 di e Statuut ta poni cu Hulanda, Aruba, Corsou y St. Maarten ta duna otro sosten y yudansa. Pero solidaridad no ta solamente importante durante situacionnan di crisis, pero ta of mester ta, un piesa permanente di Reino. Desde e Statuut Hulanda a inverti mas di 10 biyon di Euro den e islanan Caribense cu ta parti di Reino.

Andre Bosman ta naci dia 20 di januari 1965 ta Parlamentario den fraccion di Volkspartij voor Vrijheid en Democratie (VVD). E ta conoci pa su envolvimiento den asuntonan di defensa Hulandes y relacionnan den Reino Hulandes.

Na otro banda, e politico Hulandes ta para riba cu mester pone ordo si den gobernacion riba e islanan. El a repasa casonan penal den con e persigui y cera politiconan na Corsou y na Sint Maarten caba. Na Aruba el a haci mencion specifico cu tin politico cu ta den bay cera y a para un rato keto y menciona e asunto specifico di Serlimar. E no a menciona nomber di Otmar Oduber, pero ta obvio cu tur e kehonan penal entrega den su contra relaciona cu posibel corupcion den Serlimar y e hecho cu awo e compania ta na rand di bancarota, cu ta eynan su insinuacion lo por ta bayendo.

Andre Bosman: Tin politico na Aruba cla pa bay cera den investigacion na SERLIMAR

Andre Bosman: Tin politico na Aruba cla pa bay cera den investigacion na SERLIMAR. Clicl link pa mas https://24ora.news/2Zmjnd2

Posted by 24ora on Wednesday, May 20, 2020

Hulanda ta duna sosten permanente riba “rechtsorde” di hues, oficial di husticia, training y opleiding. Na e momentonan aki tin un preocupacion grandi riba Aruba, Curaçao y St. Maarten. E crisis aki ta bin door di Coronavirus cu a para e turismo y e economia ta plat. Desempleo ta na 30% y desempleo den jongnan ta mas hopi. No tin entrada p’e pais ni p’e ciudadanonan. E banco di cuminda di Curaçao tabata parti 100 paki, pero awo el a yega te cu 8000 paki, segun André Bosman, miembro di VVD. Hulanda tambe ta pasando den e crisis, unda cu restaurantnan, cafe’s a cera nan porta. Tentnan na beach ta cera, niun hende no ta bayendo beach y turistanan no ta yegando.

Tin di bin cu stapnan pa bay dilanti. Bin cu stapnan p’e hendenan cu tin un bida di pobresa awo, cu no tin un trabou y cu no ta sinti speransa pa futuro. Si Aruba, Curaçao y St. Maarten kier sali for di e crisis, nan mes mester pone nan mesun stapnan, segun Bosman. Nan tin cu reorganisa y cambia e manera bieu. E politica bieu di “pappen” y “nathouden” a pasa, pero ta ora pa un generacion nobo di politico. E politico bieu bieu ta den prizon of ta den nominacion di cay cera. Bosman a nombra algun politico bieu di Curaçao y St. Maarten cera, pero tin algun politico di Aruba cu ta cla pa drenta prizon.

Riba e 3 islanan tin oportunidad economico riba, pero nan mester gara esaki. Segun Bosman tin placa suficiente riba e islanan pa duna tur hende un salario normal. Pero mientras cu tin hende, famianan cu ta “skim” e presupuesto y hinca placa den nan mesun saco, e pobresa riba isla ta sigui. Tin “vriendjespolitiek” ta duna miho trabou na amigo, na luga di duna esun cu tin bon estudio. E economia no por bay miho si bo no ta ricibi yudansa pasobra bo no ta baila mesun ritmo cu algun famia riba e isla. Mientras cu tin oportunidadnan.

UNDA PLACA A BAY?

Bosman kier sa unda hopi placa a keda. Unda e placa a bay durante e mandato di Schotte y aki ta papia di miyones. E placa ey ta pone riba cuenta di un hende. Unda e “landtransacties” di Aruba ta? E placa di ministernan pa permisonan laboral ilegal? E placa di casinonan, unda esaki ta y impuesto di nan? E ta kere cu e placanan aki ta riba cuenta bancario di algun famia. Esnan elite di e pais ta hinca placa den nan mesun saco a costo di e pueblo cu mester biba den pobresa.

STATUUT BIEU MESTER BAY

A yega ora pa un barco nobo riba e islanan. Saca afo e politica bieu y awo ta e tempo pa haci esey. E statuut tambe ta politica bieu. E situacion actual ta mustra cu no tin autonomia den e paisnan, cu no tin posicion igual den e Statuut. Algun dirigente Caribense ta wanta duro e autonomia manera nan tin e, pero awo eynan tambe tin cu tuma decision fuerte. Kico e gobiernonan di Aruba, Curaçao y St. Maarten kier y unda no kier ta responsabel p’e? E tempo di e Statuut bieu a pasa.

VVD ta mira e logico pa duna e islanan yudansa y mester di dje per direct. Pero ora ta papia di sosten di presupuesto esaki ta un otro “ball game”. Si e placa bay den un “bodemloze put”, e ta placa tira afo, segun Bosman. Aruba, Curaçao y St. Maarten mester reorganisa pa haci nan economia duradero. Solamente a base di acuerdonan firma di e reforma y e tijdlijn por papia di un prestamo. Pero no prome, el a bisa. E condicionnan poni p’e prestamo ta mara y no ta negoshabel. E paisnan no mester ta di acuerdo, pero e ora nan no lo ricibi e prestamo.

Ta tempo p’e gobernantenan tuma rienda di e isla. Segun Bosman, Aruba a haci esey. E ta haya e declaracion di minister presidente di Curaçao no apropia. “No ta trata di loopjongen di Hulanda. Mi ta kere e ta loopjongen di habitantenan di Curaçao,” el a bisa. Ta tempo pa un statuut nobo. E Statuut ta morto, biba e Statuut.