Universidad di Aruba ta den dialogo cu gobierno. En especial ta pa haya e sosten di e edificio di Maria Convent masha concreto. Por bisa tambe cu en principio, cu sosten di gobierno tambe por continua cu e introduccion di e disciplinanan nobo aki y ta spera tambe cu tempo kisas lo sali afo pa mira si en berdad e opcion, e idea en todo caso cu e edificio di Post ta un opcion, cu esaki lo yega na dje tambe na finalisacion di esey, segun rector di Universidad, Glenn Thode.
Sa cu e edificio di post no ta di gobierno. E ta di un NV, Post Aruba NV. Tur esakinan mester ta alinea atrobe. Tin complexidad rond di cada un di e opcionnan cu tin y ta den un proceso di tempo largo pa yega na un solucion di esakinan. Semper esaki lo tuma su tempo.
Deseo
Thode a splica cu sa cu tin diferente necesidadnan cu Universidad tin. E edificio di post ta asina cu e ta duna oportunidad, no pasobra e ta un edificio, pero e tin espacio rond di dje. E tin parkeerplaats, e tin espacio patras. Una bes cu wak e plan completo, ta asina cu sigur den comienso di e ampliacion cu e estudionan di STEM (Science, Technical, Engineering, Mathematics) , no ta necesario pa tin un edificio asina den su completo. Naturalmente ta importante pa tin esaki na bista pa wak si, mirando e espacio cu edificio aki tin na su disposicion y mirando plannan di desaroyo cu Universidad tin, den ki parti di espacio pa esaki. No ta asina cu ta bisa cu naturalmente pa tal dia lo tin necesidad di edificio completo.
Tabata tin combersacion cu algun representante di Post Aruba NV, cual ta algo cu tin andando pa un paar di aña, caminda cu a hasta mira e edificio un rato, pa wak en berdad si esaki ta un opcion. E acercamento por bisa aki, tabata uno caminda cu a wak cu esaki siguramente ta un di e alternativanan cu lo sigui explora.
Ampliacion
Dia 24 di Maart, cual ta un luna pasa, a tene un dia habri (opendag) riba diasabra na Universidad. Tabata tin e oportunidad e ora ey pa comunidad bin na universidad y mira e estudionan cu ta ofrece. A ripara e dia ey, sea cu no a duna suficiente conocemento na esaki, pero a ripara cu no tabata tin e cantidad di hende cu a spera. Thode a indica cu ta importante pa hendenan orienta nan mes riba estudionan cu Universidad ta ofrece. Como Universidad, nan ta den preparacion caba pa e apertura di e proximo aña academico y ta importante pa e hendenan na Aruba, cu ta considera un estudio universitario, pa orienta nan mes di loke universidad ta ofrece.
Ta importante pa mira nan website, cual ta www.ua.aw. Eyriba lo haya informacion encuanto e estudionan cu ta ofrece. A trece dilanti e dia ey entre otro, con e academic foundation year ta andando. Ta den un proceso awor aki pa evalua esaki. Pero a haya, mirando e resultado, mirando e cantidad di studiante cu a yuda y sostene pa amplia nan base academico pa un estudio academico cu ta continua, a haya cu esaki ta dunando bon fruta. Algo cu tabata inespera pa Universidad, cu algun di e creditnan cu e studiantenan a haya na e Academic Foundation year aki, cu e estudionan cu nan a scoge despues, ora cu e module cu nan a sigui na Universidad, ta algo cu tambe ta den e estudio cu nan a scoge, a haya e creditnan, mientras cu e programa originalmente no ta diseña pa esaki. Ta algo cu ta yena universidad cu alegria. E resultado ta reconoci y e calidad ta bon y ta den contacto cu e mayornan tambe di e alumnonan cu ta sigui cu e estudio aki. A ripara cu nan ta duna universidad indicacion cu nan ta contento pa mira e desaroyo cu nan yiu ta pasa door di dje ora cu nan bin na e Academic foundation year tambe.
Banda di esey e facultadnan manera esun di derecho, cu su bachelor y masters degreenan, FEF , cu tin awor aki dos estudio. Nan ta preparando tambe un sorto di controlers opleiding y pronto lo saca esaki tambe den medionan pa recluta e studiantenan pa esey. Ta algo andando y pronto lo invita tur hende pa wak, sigui bon riba nan website e desroyonan aki.
Tin tambe nan FAS cu ta ofreciendo tres estudio. Un di nan ta estudio di matematica. E aña aki no ta start un cohort nobo den esey. Pero e loke si ta cuminsa cun’e ta Organization Governance and management and Social Work and Development. Tambe e facultad di Faculty of tourism managment, cu tambe ta ofrece su programa e aña aki.
