Cindy v/d Linde ta un hoben Rubiano profesional den medicina estetica kende a caba di habri su propio negoshi ‘Cella Health & Aesthetics Clinic’ den centro historico di Den Haag, Vos in Tuinstraat 3 pa ta exacto.
E clinica a habri recientemente riba 1 di maart 2024. Cindy ta bisa cu e trayecto pa yega na e apertura tabata uno basta divertido, e mester a saca hopi di su creatividad pa pensa riba idea y concepto den su totalidad. “Mi kier a traha algo cu ta trece e calor cu nos conoce na Aruba, e empatia pa e pashent, y tambe enfocando riba algo cu ta saludabel y ta beneficia e pashent na termino largo.”
Cindy ta conta cu esey ta algo cu e mester a ‘think outside the box’ anto a logra esey cu Cella. Con facil esaki tabata ta como hoben empresario Rubiano na Hulanda, ta un pregunta cu Cindy a contesta cu sigur como ‘stranhero’ esaki tabata tin su reto.
Cindy ta splica cu e tabata sa caba di comienso cu esaki lo ta un reto cuminsando den haya un luga. E ta bisa cu na Aruba por ehempel nos ta hopi mas chikito y nos conoce hende, nos sa mas o menos ken pa puntra, pero na Hulanda ta ful diferente. “Mi no conoce ningun hende na Den Haag, e tabata algo cu mi mes mester a haci, dianan cu mi mester a bin cana rond na Den Haag wak kico ta disponibel, online.” E tabata un combinacion di haci su miho esfuerso y tambe un tiki suerte cu a haya e luga cu e tin awor.
E no tabata facil tampoco pasobra e mester a demostra na e verhuurder cu e lo traha un luga cu ta pas p’e localidad y cu lo ta exitoso. E mester a haci su best pa traha un bista completo riba su plan, pa kico e lo ta exitoso y pa kico nan tin cu kere den su proyecto.
Ora mester a bay banco tambe busca prestamo tambe mester a mustra nan cu esey ta su vision, e ta diferente di tur clinica den e area y pa kico nan tin cu kere den dje. Cindy ta bisa cu el a logra esey, tur a kere den su vision y proyecto, y p’esey por a yega asina leu pa habri Cella. “Cu un idea bunita, convenciendo e personanan corecto, mi a logra habri Cella. Te ainda mester sigui busca, network, y sigur hende corecto den bo circulo cu por yuda bo, sostene bo y duna bo bon conseho, pasobra e ta un ‘work in progress’ y semper lo ta asina.”
TUR COS A CUMINSA NA COSTA RICA
E comienso di Cindy su trayectoria den medicina a cuminsa na Costa Rica. E ta bisa cu semper e kier a studia medicina. Pero pasobra el a nace na Aruba, un reto grandi tabata ta pa scoge unda pa bay haci bo estudio. Manera nos sa gran parti di studiante ta bula bay Hulanda pero e temporada cu Cindy tabata studiante, tabata tin hopi cos negativo rond estudionan na Hulanda. Dus con hopi hende no ta sigui nan estudio ora nan ta eynan y su mayornan mes tabata preocupa di esey.
Dus Cindy cu su ruman homber a bay Costa Rica pa sigui studia, poco mas cerca di Aruba tambe cu por haya bishita, e clima tabata un poco mas miho tambe pero no e parti di idioma. “Nos tabata haya Spaño na scol, pero esey tabata un reto masha grandi e prome dia den klas, tur cos tabata splica na Spaño.
Esey tabata un reto y learning-curve hopi grandi cu mi a hinca mi mes fuera di mi zona confortabel.” Cindy ta conta cu el a siña hopi, manera con un pais manera Costa Rica cu tin su limitacionnan economico, ta maneha nan mes asina bunita pa toch sirbi nan comunidad y pashentnan.
“Mi a stima e trayecto eynan. E no tabata facil, pero si mi mira bek, e no lo cambia nada.”
E AVENTURA A SIGUI NA HULANDA
Cindy a opta toch pa establece su clinica na Hulanda, hasta bay tera friu pa completa un parti di locual ta esencial di su estudio pa eherce su profesion. Despues cu el a caba na Costa Rica, no tabata tin consensus na Aruba riba kico lo pasa cu mediconan cu a studia den region segun Cindy. E ora ey pa motibo cu e no por a wak algo concreto, un decision of hasta sinti su mes insigur di su futuro, a dicidi toch pa bay haci su BIG Registratie (beroepen in de individuele gezondheidszorg) na Hulanda pa periodo di 1 aña.
El a logra esaki na 2019 y ta bisa cu e ta spera cu esey demostra cu no ta trata unda cu bo a studia pasobra medicina ta algo hopi general y amplio. Na Hulanda nan ta traha cu nan propio criterio, den comparacion cu Costa Rica cu tambe ta traha cu nan mesun criterio. Unabes bo compronde esey bo ta haci bo profesion cu pasion y amor, bo no por faya den medicina.
E parti di cuestiona un profesion of estudio di unda e ta bin, mester bin un consenso pa cu esaki. Cu ARU-BIG, Cindy ta haya cu ta parce nan ta trahando ariba e parti ey dus mester wak kico ta pasa. Pero mientrastanto, Cindy a haya su BIG Register cual ta dun’e hopi mas flexibilidad na Hulanda of cualkier parti di mundo.
CONSEHO PA OTRO HOBEN PROFESIONAL
Un cos cu Cindy a siña den su bida y trayecto ta cu tur experiencia cu el a pasa den dje a siñ’e con pa tuma cierto decisionnan. Ora cu Cindy a bay Hulanda, e no tabata biba na Den Haag, el a traha na Hospital na Rotterdam y biba eynan, dus su conocemento tabata hopi na Rotterdam. Pa algun motibonan personal, el a haya su mes ta pasa den Den Haag y busca un luga.
Cual tabata un reto grandi pasobra no tabata conoce nada ni ningun hende na Den Haag. Locual e ta corda di algun conocinan di dje di Aruba ta cu Denweg ta un caya conoci y cu e conoce, el a scucha di dje, e tin bon nomber, e lo kier algo rond di Denweg. Cindy a bay den e area, cana rond y tuma nota cu e periodo ey tabata tin rond tres localidad habri. Pa casualidad e ta conta e tabata cana cu e verhuurder cu a bis’e cu tin un luga un tiki mas caro, un bon area toch cu lo pas bon cu loke Cindy tabata buscando.
E localidad so riba su mes ta haci e facil pa otro companianan cu kier traha cu Cindy, e localidad tabata sumamente importante y ta contento cu el a logra hay’e. Cindy ta enfatisa cu e ta sigur riba bo esfuerso cu bo ta hinca den bo meta, e hendenan cu bo ta papia y conecta cu nan, y bo experiencia, un combinacion completo pa logra realisa bo soñonan.
Cindy ta bisa cu su meta ta pa crece su clientela awor y esey e kier focus den duna educacion, dus conscientisacion riba con por cuida bo mes, anti-aging y henter e proceso. “Mi kier splica bo pa kico, kico ta e proceso, pa bo conoce bo curpa y kico ta pasando den bo curpa pa bo sa pa kico cierto cosnan ta bon pa abo y pa kico cierto cos no, pasobra tur hende ta diferente.
Cindy su meta awor ta sigui na combina educacion hopi cu servicionan y esey ta un pasion, unda semper e kier a yuda hende, y ta sinti cu den e forma aki e por combina su creatividad y su pasion pa yuda hende den e miho manera cu e por.
