Minister di Asuntonan Economico, Comunicacion y Sostenibilidad Geoffrey Wever, a ricibi un delegacion di e Embahada Hulandes for di Bogota, Colombia. Presente tabata e representantenan di Departamento di Asuntonan Economico, Comercio y Industuria, di Departamento di Relacionnan Exterior y varios consehero di Minister Turismo y Salubridad Publico.
E embahada Hulandes na Colombia, hunto cu Holland House Colombia, tin e tarea pa fungi como facilitador pa interes di e islanan di Reino den nos region di Caribe. Mientras cu Embahada ta encarga cu e aspectonan gubernamental, Holland House Colombia ta encarga cu aspecto di laso empresarial.
E temanan cu a trece dilanti tabata e relacionnan comercial entre Aruba y Colombia, energia renobabel, economia circular, turismo medico y siguridad di alimento, specialmente importacion di carni procedente di Colombia.
Den e area di relacionnan comercial, a toca riba e interes comercial general entre e dos paisnan, tanto pa importacion y exportacion di producto y servicio, impuesto existente den esaki y tambe inversion. Na final di e reunion, e partidonan a expresa nan deseo pa elabora un plan concreto pa duna forma na e deseonan comercial treci dilanti pa Aruba y Colombia.
