Un crucero transatlantico cu mas cu 600 pasahero abordo, algun for di dia 12 di februari, ta nabega den Caribe sin haya un solucion.
NO a logra baha pasahero den nan biahe crucero den Caribe na La Romana na Republica Dominicana dia 27 di februari despues cu a raporta algun caso di griep.
A dicidi di programa un parada na St. Maarten dia 2 di maart pa permiti pasaheronan baha y tuma un buelo charter bek pa United Kingdom. Pero a tuma pasaheronan nobo pa sigui e biahe pa Jamaica. Despues lo mester a bay Costa Rica, Panama, Colombia, Corsou y yega Barbados dia 12 di maart.
Den e periodo aki diferente puerto a nenga nan entrada mientras cu tin cinco caso di coronavirus confirma abordo.
Funcionarionan Britanico a lansa un campana diplomatico pa haya un pais pa ricibi MS Braemar, cu ta pertenece na un compania Britanico, Fred Olsen Cruise Lines. Binti pasahero y 20 miembro di tripulacion, incluyendo un dokter, ta den isolacion despues di a presenta sintomanan di griep ora cu nan tabata abordo di e barco.
Awo Braemar ta mara na mas o menos 25 miya offshore di Bahamas, sperando aprobacion di Gobierno local pa trece alimento, fuel y remedi, y tambe dos dokter y enfermero kende ta prepara pa asisti e team medico abordo.
E crucero cu 682 pasahero y 381 miembro di tripulacion, a yega Bahamas diasabra. Aki tambe a prohibi nan di mara den waf, pero a permiti nan ancra un poco pafo di costa. “Ningun otro waf Caribense tabata dispuesto pa acepta e barco debi na e sentimentonan local pa cu COVID-19 coronavirus,” e compania a bisa den un declaracion.
Ta trahando riba solucion pa e pasaheronan por yega nan pais y cas mas lihe posibel. Ta sondea tur posibilidad, hasta ta papiando cu autoridadnan di Cuba. Un plan pa biaha bay United Kingdom ta descarta pa motibonan logistico.
A conseha pasaheronan pa isola nan mes y tuma conctacto cu e centro medico si nan ta sinti malo, E bar y restaurantnan ta habri.
Dialuna, 9 di maart, e compania a raporta cu dos persona cu tabata riba Braemar a keda diagnsotica cu coronavirus despues di a bolbe cas. Seis persona cu sintomanan di griep, riba e barco, a pasa den test, y cinco caso a keda confirma diaranson – cuatro tripulante y un pasahero – cu un otro resultado inconclusivo.
E barco no por a mara na Corsou diamars of Barbados diahuebs y a cambia rumbo pa Bahamas, unda e barco ta registra, cu e intencion pa baha e pasaheronan.
E compania a bisa cu tur bon intencion a tuma pasaheronan nobo, ya cu ningun cu a subi na Sint Maarten a declara di ta malo y ningun a biaha pa areanan di alto riesgo y tampoco tabata exponi na personanan cu e virus aki.
Mientras cu ta busca solucion pa e pasaheronan por bay nan cas, a cancela tur biahe te cu 23 di mei.
