Compara cu september 2018, den e luna di october 2018, e cantidad di placa den circulacion a cai cu Afl. 50,5 miyon te na Afl. 4.323,2 miyon. Esaki a resulta door di bahadanan den e reserva di divisa netto (-Afl. 28,1 miyon) y e activo domestico netto (-Afl. 22,4 miyon).
E reserva di divisa netto di e sector bancario a disminui debi na benta netto di divisa na publico (-Afl. 205,0 miyon), primordialmente relaciona cu entrada for di importacion di mercancia y otro servicionan. Esaki a wordo mitiga pa un gran parti pa compra netto di divisa for di publico relaciona cu entrada for di exportacion di turismo (+Afl. 176,9 miyon).
E bahada den e activo domestico netto a wordo causa pa un gran parti pa un reduccion den credito domestico (-Afl. 20,8 miyon), mientras cu transaccionnan no relata na credito a baha un poco (-Afl. 1,6 miyon). E desaroyo den credito domestico a resulta mas tanto for di un caida den credito bancario netto na e sector publico (-Afl. 19,6 miyon) y parcialmente pa un bahada den credito bancario na e sector priva (-Afl. 1,2 miyon). E caida den credito bancario netto na e sector publico ta debi na crecemento den e depositonan di gobierno (+Afl. 19,7 miyon). Credito bancario na e sector priva a baha door di menos credito na consumidor (-Afl. 4,1 miyon), credito na empresa (-Afl. 1,2 miyon), mientras cu hipoteca pa vivienda a crece (+Afl. 4,1 miyon).
Inflacion
E nivel general di prijs, cu ta wordo midi door di e indice di prijs di consumo, a registra un subida di 4,2 porciento den e luna di october 2018, compara cu october 2017. E contribuyentenan principal na e aumento aki tabata e componentenan “Transporte”, “Cuminda y Bebida No-Alcoholico” y “Recreacion y Cultura”. Si exclui e componentenan di cuminda y energia for di e indice di prijs di consumo, inflacion a mustra un aumento di 2,3 porciento compara cu october 2017. Pa loke ta trata e promedio anual di e tasa di inflacion, esaki a registra 2,7 porciento na october 2018, compara cu 2,3 porciento na september 2018.
Turismo
Na october 2018, e cantidad di turista a registra 80.820 bishitante, cual ta 663 bishitante (-0.8 porciento) menos cu na october 2017. E bahada aki a resulta for di un reduccion den e mercado Latino Americano (-2.404 bishitante of -15,5 porciento), mitiga pa un gran parti pa un subida den e mercado Norte Americano (+2.005 bishitante of +3,7 porciento).
E caida den bishitante for di e mercado Latino Americano ta debi na menos cantidad di bishitante for Venezuela (-2.994 bishitante of -42,0 porciento), mientras cu e subida den e mercado Norte Americano a resulta principalmente door di mas bishitante for di Merca (+1.992 bishitante of +3,9 porciento).
E cantidad di turista crucero a registra un crecemento di 2.758 bishitante of 5,3 porciento te na 55.056 bishitante na october 2018, compara cu october 2017. E cantidad di barconan a baha for di 25 na october 2017 pa 22 na october 2018.
Entrada di Gobierno
Tuma nota cu e cifranan di entrada di gobierno no tabata disponibel na momento di publicacion di e relato aki.
