Pa hopi aña e Dump di Parkietenbos tabata un di e problemanan ambiental mas grandi di nos isla. Esey tabata un di e motibonan pa cual Gobierno a dicidi di cer’e entrante prome di januari 2023.
Pero en bes cu esaki a trece un solucion p’e problematica di sushi, esaki a haci e situacion awo mucho mas pio. Rond di nos isla a lanta yen di dumpnan chikito cu sigur ta haci e problematica di sushi mas grandi. Segun e mandatario encarga cu Naturalesa, Ursell Arends a bisa cu e cantidad di dumpnan ilegal cu tin rond, no ta algo di awo, pero ta for di basta tempo caba.
Hunto cu e Departamento di Naturalesa y Medio Ambiente, a caba di constata cu tin un total di 43 buraco rond di nos isla y shete di nan ta uza nan como dump ilegal. Esaki ta data di 2009 y a traha un rapport unda cu a constata cu tur e dumpnan ilegal, y na 2016 a traha un asina yama maneho pa con pa atende cu esaki, pero nunca a reenforsa esaki.
Actualmente ta den proceso cu a prepara un TOR (Terms of Reference) pa habri un oportunidad pa bin c’un ‘third party’ bin c’un bid, pa asina constata kico ta e sanering di e areanan aki.
