Studiementor di Arubahuis Lourdes Bramble-Tromp a ricibi awe 26 di april un dia prome cu Dia di Rey un condecoracion real.
Na stadhuis di Alkmaar burgemeester Anja Schouten a otorga Lourdes e “lintje” di “Ridder in de Orde van Oranje Nassau” den presencia di su esposo Alfred Bramble, su dos yuinan y nan pareha. Den De Grote Sint-Laurenskerk na Alkmaar a tuma lugar un recepcion pa e condecoadonan y nan famia y amigonan. Na e ocasion aki Minister Plenipotenciario mr. Ady Thijsen a felicita Lourdes cu e reconocemento aki.
Lourdes ta studiementor di Arubahuis pa e region di Amsterdam, Diemen, Haarlem y Alkmaar. Tambe e ta duna guia na studiantenan na Zwolle, Deventer y Enschede. Un total di 11 studiante a motiva e peticion pa un condecoracion pa Lourdes unda nan tur tabata tin hopi aprecio pa e sosten cu Lourdes a duna nan, tanto prome cu nan a bin studia, como durante di nan estudio. Tambe e studiantenan ta bisa cu Lourdes tin masha hopi comprension, tur ora e ta disponibel pa yuda cu conseho y tip con pa resolve bo problemanan.
Lourdes pa hopi aña a traha den e sector social na Alkmaar y Hoofddorp. Banda di su trabao, semper su porta ta habri pa brinda ayudo na e personan den necesidad. Segun Lourdes esaki ta loke cu el a lanta cu ne na Aruba. Lourdes: ‘Na Aruba semper nos cas tabata habri pa duna ayudo na personanan cu tin mester, tanto adulto, pero principalmente mucha. Na otro banda mi tanta Louisa tabata un señora cu un bon curason. E sentimento pa yuda hende, mi a lanta cu ne. Semper yuda sin pidi reconocimento,’ asina Lourdes a bisa.
Lourdes den su tempo liber tambe a duna un aporte grandi na cultura di Aruba, principalmente cu grupo di baile y grupo di Carnaval.
Minister Plenipotenciario mr. Ady Thijsen a bisa Lourdes Bramble-Tromp cu Aruba ta orguyoso cu e condecoracion aki pa su persona y su logronan como studiementor y riba tereno social y cultural.
