Den fin di siman a tuma nota di varios persona den pak special pa fumiga tur skina di Abraham de Veer School situa den Jan van Nassaustraat na San Nicolas. Despues di varios mensahe cu nos redaccion a ricibi di nos usuarionan, bisando cu tin algun caso di Covid-19 n’e scol, mesora a tuma contacto cu e director.
Den combersacion cu Jane Bueno-Hooft, director di e scol, a confirma cu Coronavirus a bati na porta di e scol. Ta trata di un solo caso, un studiante di examklas, a presenta na scol cu e virus. Parce t’un famia di e studiante ta positivo pa Covid y e studiante a contagia cu ne tambe. Den cas di e studiante tin caso positivo y DVG ta obliga tur persona cu tabatin contacto pa keda shete dia den cuarentena obligatorio pa wak si a haya sintoma di e virus.
El a cumpli cabalmente cu e cuarentena y no a ricibi ningun sintoma, ta tres dia despues cu a sali di cuarentena a ricibi e señalnan aki pero ya a cuminsa bay scol caba bek. Porta Crisisteam mester amplia e shete dia di cuarentena pa personanan cu tabatin contacto pa mas dia?
Pa evita cu e virus a sigui plama, a manda tur studiante di examenklas den cuarentena, ta trata di tres klas. E director no ta kere cu e virus a expande su mes n’e scol mirando cu tur studiante tabatin nan mondkapje bisti. Les ta sigui normal pa e candidatonan di examen pero via Zoom, Teams etc. Klas 1, 2 y 3 ta keda ricibi les fisicamente na scol mes.
