Diamars anochi polis a presenta na Watergate Restaurant p’un caso peculiar. Aki ta caminda cu un famia di cinco a presenta pa un anochi di cena. Tres mucha, mama y tata a presenta bon bisti. A pidi; chicken cutsmall, fried rice, batata hasa, galiña y refresco. E cuenta a sali rond cincuenta florin.
Despues di a come, a bay na bar pa paga. Na prome instante a bisa cu e carchi di banco tin problema y cu lo bay bolbe pa paga e cuenta. E mama a sali hunto cu e tres yiunan prome, cu intencion pa bay cas y busca placa cash. E tata a keda atras estilo garantia.
Den un frega di wowo e tata a sali na careda y bandona e luga. Polis a presenta pa tuma tur informacion necesario, a cuminsa cu un buskeda den e area pero no a topa cu nan. E propietario ta compronde cu situacion ta dificil, y hasta ta dispuesto pa a regala e famia un box di cuminda, pero di e forma con a organisa e cena, no ta aceptabel p’e.
