Ministerio Publico a cera un acuerdo di transaccion den e caso criminal “Flamingo” cu e sospechoso Hans J.P. Geerman, presentado di e noticia “Noticiero Dinamico” di tur mainta na Radio Top 95 FM. E locutor, obviamente hopi yega na partido MEP, lo mester paga un suma di Afl. 125.280,13 como transaccion pa evita cu e ta yega dilanti hues den e caso penal, den cual ex-Minister Otmar Oduber ta e sospechoso principal.
Ta sospecha Hans Geerman di a estafa Pais Aruba y di corupcion activo di Minister di Ruimtelijke Ontwikkeling, Infrastructura y Medio Ambiente (ROIM), esta Otmar Oduber, durante e periodo di 1 di april 2019 te 30 di maart 2021. Den e investigacion, a identifica Hans Geerman como un asina yama “spookambtenaar” of “ambtenaar spirito”.
Ministerio Publico ta opina cu e investigacion a mustra cu e minister a nombra e locutor di radio Top 95, esta Hans Geerman, como medewerker bedrijfsvoering, pero cu e no tabatin mester a haci ningun trabao en cambio y cu e no a haci ningun trabao tampoco. A cambio pa e salario cu el a cobra di Pais Aruba, e tabata haci propaganda pa e minister na radio!
Ministerio Publico ta di opinion cu door di esey, Hans Geerman a haci su mes culpabel na estafa y corupcion. E suma di transaccion ta consisti di pago di un suma di placa di en total Afl. 125.280,13. A yega na e suma aki door di conta e boet di Afl. 5000,- plus henter e suma cu Geerman a ricibi inhustamente di Pais Aruba, esta, Afl. 120.280,13.
Considerando tur echo y circunstancia, incluso e echo cu no tin victimanan of partinan perhudica di kende nan interesnan a wordo perhudica di algun forma of otro door di realisa e transaccion aki, Ministerio Publico ta considera cu e transaccion menciona ta un acuerdo apropia
pa Geerman.
Ministerio Publico a tene cuenta cu tramitacionnan den casonan similar. Ministerio Publico ta di opinion cu e suma di e transaccion ta haci husticia na e echonan y na e rol specifico cu Hans Geerman a hunga den e investigacion penal di Flamingo. Ministerio Publico ta enfatisa cu e transaccion aki no tin influencia riba e e curso di e proceso penal contra e otro sospechosonan den Flamingo.
Si en caso Hans Geerman keda sin cumpli cu e condicionnan palabra, e tambe lo wordo cita pa presenta dilanti hues!
