Garage Centraal tin un bunita sorpresa pa su clientenan. Durante e evento di moda cu ta bay tuma luga den Marriott Resort Aruba, e fin di siman aki, lo presenta un style special cu modelo nobo di Hyundai Tucson 2024.
Dialuna mainta trempan Rodney Kock, director di mercadeo di Garage Centraal, a informa cu nan ta un di e sponsornan di Fashion Week. Den cuadro di esey a probecha e evento aki pa promove e talentonan local, pa nan tambe sobresali.
A analiza diferente diseñado y na final a scoge e arte di Ryon Dijkhoff. E lo tin su diseño cu lo desfile riba pasarela. Pero a dicidi di crea un diseño di dje riba e modelo nobo di Hyundai Tucson. A haya hopi interesante y atractivo con Dijkhoff ta hinca su diseñonan di joyas den otro, unda ta combina modernismo y elementonan cultural, cu arte. Un calidad halto, mescos cu loke Hyundai Tucson 2024 ta ofrece.
E evento di Fashion Week ta tuma luga cu cooperacion di Garage Centraal den e fin di siman cu ta bini. Daniel Leon, organisado di e fashion show aki, tambe tabata presente den e introduccion di e auto especial aki, cual lo ta den show durante e evento. Pero no e vehiculo nobo sin mas, pero cu un diseño special riba dje. E ta cubri pa diferente dibuho di pinturanan di indjan di antes. Pues historia di Aruba y e joyanan aki riba e Hyundai Tucson.
E artista a cuminsa cu su diseñonan den añanan di pandemia. El a purba semper di trece piesanan autentico y sofistica, cu e meta pa mustra mundo completo con Rubianonan tambe por diseña y traha obranan di calidad.
Dijkhoff a keda masha impresiona con e diseñadonan a pone su obranan riba e vehiculo nobo di Hyundai Tucson. El a splica cu riba hood di e vehiculo tin un patronchi di e tegelnan di antes na e casnan Rubiano, mescos cu na e cas di su welonan.
Aña pasa december el a saca un linea di joyas cu ta representa pinturanan di indjan. Aruba tin descubri 450 pintura di indjannan cu a biba aki.
E pinturanan di indjan lo resalta den e diseñonan di joyas cu e lo bay ta sacando poco-poco y cu por bay mira tambe den Fashion Week cu lo tuma luga e fin di siman aki.
Un gratitud inmenso el a sinti na momento cu el a mira e vehiculo pa prome bes. “E ta duna mi kippevel di mira con leu mi soñonan ta yega y mas pa e apoyo cu ta ricibi di companianan local.”
Hyundai Tucson 2024
Esaki ta e miho modelo te awo, cu un diseño parametrico agresivo y unico. Ta combina e detaye di e diseñadonan di Hyundai cu e parti cu ta haci cu computer pa duna bida na diseñonan radical.
Algo cual ta resalta den e diseño aki por ehempel ta cu a integra e DRL (Data Running Light) den e grill. Den oranan di anochi, e luz ta mustra diferente na cualkier otro auto riba caminda y ta identifica di biaha cu tin un Hyundai Tucson biniendo. El a mantene su nivel di calidad mustrando pakico e ta un di e SUV-nan preferi na Aruba.
Durante e evento di Fashion Week tin chens pa saca un potret dilanti e auto. Lo tin un fotografo na e sitio.
